Bokstan Qazaqstan quramasy 2025 jyly eki álem birinshiligine qatysady
ASTANA. KAZINFORM - Bokstan Qazaqstan erler quramasynyń bas bapkeri ulttyq komandanyń 2025 jylǵa arnalǵan josparlarymen bólisti. Bul týraly Qaırat Sátjanov «Sport mınıstri» YouTube-kanalyna bergen suhbatynda aıtty.
1bol.kz sporttyq portalynyń málimetinshe, kelesi jyly qazaqstandyq boksshylar eki álem chempıonatynda baq synaıdy. Onyń birinshisin IBA (Halyqaralyq boks qaýymdastyǵy), ekinshisin World Boxing uıymdastyrady.
Jarystarǵa daıyndyq aıasynda birneshe oqý-jattyǵý jıyny men týrnır josparlanyp otyr. Atap aıtqanda, qańtar aıynda Ispanııada birlesken jattyǵý lageri ótkizilip, sol jerde halyqaralyq týrnır uıymdastyrylady. Aqpanda Bolgarııada dástúrli «Strandja kýbogy» týrnıri ótedi. Naýryzda Reseıdiń Kıslovodsk qalasynda Reseı, Ózbekstan jáne Ázerbaıjan quramalarymen birlesken jattyǵýlar men týrnır josparlanǵan.
IBA uıymdastyratyn álem chempıonaty mamyr aıynda Túrkııada ótedi. Buryn bul týrnır Astanada ótkiziledi dep josparlanǵan edi. Degenmen jospar ózgerip ketti. Al World Boxing chempıonaty qyrkúıek aıynda alǵash ret jalaýyn jelbiretedi.
Qaırat Sátjanov barlyq boksshy osy týrnırler men jattyǵý jıyndaryna qatysatynyn atap ótti. Sol boıynsha ulttyq quramanyń ár sportshysynyń qabiletteri baǵalanyp, jospar qurylady.