Bokstan Qazaqstan erler quramasy Ulybrıtanııaǵa attandy

ASTANA. KAZINFORM - Bokstan Qazaqstan erler quramasy World Boxing aıasynda ótetin álem chempıonatyna qatysý úshin Ulybrıtanııaǵa attandy.

Bul jóninde Qazaqstan boks federatsııasy málim etti.

Ulttyq qurama Sheffıld qalasyndaǵy halyqaralyq jıynǵa qatysyp, bir aptadan soń Lıverpýlge jol júredi. Dúbirli doda 4-14 qyrkúıek aralyǵynda atalǵan qalada ótkiziledi.

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde saıysqa túsedi. Al 12-13 qyrkúıekte jartylaı bolsa, 13-14 qyrkúıekte fınaldyq básekeler ótedi.

Elimizdiń erler quramasynyń bas bapkeri Qaırat Sátjanov negizinen tájirıbeli boksshylarǵa senim artyp otyr. Olardyń qatarynda Sanjar Táshkenbaı (50 keli), Mahmud Sabyrhan (55 keli), Beıbarys Jeksen (60 keli), Ertýǵan Zeınýlınov (65 keli), Tórehan Sabyrhan (70 keli), Sabyrjan Aqqalyqov (75 keli), Nurbek Oralbaı (80 keli), Bekzat Nurdáýletov (85 keli), Saǵyndyq Toǵambaı (90 keli) men Aıbek Oralbaı (90 keliden joǵary) bar.

Al Eldos Saıdalın bastaǵan bapkerler áıelder quramasynda tómendegi bylǵary qolǵap sheberlerine senim artty. Aldaǵy álem chempıonatynda elimizdiń atynan Nazym Qyzaıbaı (48 keli), Alýa Balqybekova (51 keli), Elına Bazarova (54 keli), Karına Ibragımova (57 keli), Vıktorııa Grafeeva (60 keli), Aıda Ábikeeva (65 keli), Natalıa Bogdanova (70 keli), Nadejda Rıabets (75 keli), Gúlsaıa Erjan (80 keli) jáne Eldana Talıpova (80 keliden joǵary) synǵa túsedi.