Bokstan Qazaqstan chempıonatynda aǵaıyndy jigitter jeńimpaz atandy
Birinshilik qorytyndysynda 13 salmaq dárejesi boıynsha chempıondar anyqtaldy.
Fınaldyq básekede 48 kelige deıingi salmaqta 2021 jylǵy álem chempıony, Aqmola oblysynyń ókili Temirtas Júsipov almatylyq Ernur Qaırattan tájirıbesi men sheberliginiń basym ekendigin kórsetti.
Almaty oblysynan kelgen Damır Ábdiqadyr (51 kg) batysqazaqstandyq Danııal Sábıtpen judyryqtasty. Bul salmaqta tóreshiler sheshimimen jeńis D.Ábdiqadyrǵa berildi. Osydan eki jyl buryn 18 jasynda fınalda T.Júsipovti utyp, Qazaqstan chempıony atanǵan D.Sábıt ótken jyly Sanjar Táshkenbaıǵa ese jiberse, bıyl da kúmis júldeni qanaǵat tutty.
Budan keıin 54 kg salmaqta 19 jastaǵy qyzylordalyq Nursultan Altynbek aqtóbelik Bekzat Aldamjarovtan aılasyn asyrdy.
57 kelige deıingi salmaqta fınalda aqmolalyq Orazbek Asylqulovpen bokstasqan pavlodarlyq Erbolat Sabyrdyń qoly kóterildi.
Qaraǵandylyq Talǵat Syrymbetov (60 kg) Almaty oblysynyń ókili Erasyl Tańqaıdy qapy qaldyrsa, bıylǵy Azııa chempıonatynda el namysyn qorǵaǵan mańǵystaýlyq Sanatáli Tóltaev 63,5 kelige deıingi salmaqta túrkistandyq Muhamedsabyr Bazarbaıulyn jeńdi.
Shymkenttik, 19 jastaǵy Abzal Serik (67 kg) túrkistandyq Temirhan Tezekti tize búktirse, Abaı oblysynan kelgen Ermahan Jakpekov (71 kg) batysqazaqstandyq, 20 jastaǵy Sabyrjan Aqqalyqovty utty.
Jambyldyq Dıas Moljigitov (75 kg) pavlodarlyq Aıatýlla Tákijanovtan basymdylyǵyn baıqatsa, taǵy bir abaılyq, Ermahannyń inisi, 20 jastaǵy Erasyl Jakpekov (80 kg) aqtóbelik Jánibek Qartbaevty jeńdi.
Osylaısha, bir úıden aǵaıyndy Jakpekovter Qazaqstan chempıony atandy. Jalpy, elimizde aǵaıyndy Nurbek pen Aıbek Oralbaı jáne Sanatáli men Samatáli Tóltaevtyń tabysty óner kórsetip júrgeni belgili.
Bıylǵy Azııa chempıonatynyń qola júldegeri, túrkistandyq Saǵyndyq Toǵambaıdyń (86 kg) úshinshi raýndta qasy jarylyp, qazylar uıǵarymen pavlodarlyq Shaımurat Qusaıynovqa jol berdi.
Tájirıbeli boksshy, taǵy bir túrkistandyq Abzal Quttybekov (92 kg) almatylyq, sport sheberligine úmitker Danııar Rahımberdınovtiń meselin qaıyrdy.
Asa aýyr salmaqta atyraýlyq Amanat Sabyrǵalımen rıngke shyqqan almatylyq Damır Toıbaıdyń baǵy jandy.
Sonymen, Qazaqstan chempıonaty aldyńǵy tolqynnyń izin basa alatyn jas boksshylardyń da ósip kele jatqandyǵyn kórsetti.
Eske sala keteıik, budan buryn bokstan Qazaqstan chempıonatynyń fınalyna shyqqan sportshylar anyqtalǵanyn jazǵan bolatynbyz.
Ashyq kózderden alynǵan foto
