Bokstan Qazaqstan chempıonaty: alǵashqy jeńimpazdar anyqtaldy

ORAL. QazAqparat - Oralda tennıs ortalyǵynda Táýelsizdiktiń 30 jyldyǵyna oraı bokstan erler arasynda Qazaqstan chempıonatynyń fınaldyq básekeleri ótýde, dep habarlaıdy QazAqparat tilshisi.

Sharshy alańǵa alǵashqy bolyp asa jeńil salmaqta batysqazaqstandyq Danııal Sábıt pen elordalyq Sanjar Táshkenbaı shyqty.

Bul básekede jastar arasynda 2021 jylǵy álem jáne Azııa chempıony S.Táshkenbaı jeńiske jetti.

Budan keıin 51 kg salmaqta taǵy bir batysqazaqstandyq Nursultan Nurıdenov pen Almaty oblysynyń ókili Damır Ábdiqadyr chempıondyq ataqty sarapqa saldy. Munda tóreshilerdiń biraýyzdan sheshimimen D.Ábdiqadyrdyń qoly kóterildi.

Sondaı-aq 54 kg salmaqta tartysty básekede 3:2 esebimen atyraýlyq Oljas Baınııazovty súrindirgen qaraǵandylyq Talǵat Syrymbetov úzdik shyqty.

Fınaldyq jekpe-jekter odan ári jalǵasýda.

Eske sala keteıik, budan buryn el chempıonatynda alǵashqy fınalıster belgili bolǵanyn jazǵan edik.