Bokstan Qazaqstan chempıonaty Aqtaýda ótedi
Qazaqstannyń boks federatsııasy óńirlerden kelip túsken ótinishterdi tyńǵylyqty zerdeleı kele, Qazaqstan chempıonatynyń jalaýyn Kaspıı óńirinde jelbiretemiz dep uıǵardy.
Mańǵystaý jerinde tuńǵysh ret ótkeli otyrǵan bokstan respýblıka birinshiligi eki myń jankúıerge shaqtalǵan «Mańǵystaý Arena» sport kesheninde 11 men 18 qarasha aralyǵynda ótedi dep josparlanǵan.
Mańǵystaý oblysy boıynsha boks federatsııasynyń prezıdenti Marat Ormanovtyń aıtýynsha, baıraqty báseke Aqtaý qalasynyń 55 jyldyq mereıtoıymen de ushtastyrylyp otyr.
«Mańǵystaý oblysynda bokstyń bedeli asqaqtap tur. Myńdaǵan jastarymyz osy sportqa den qoıǵan. Barlyq 5 aýdan men Jańaózen, Aqtaý jáne Fort-Shevchenko qalalarynda boks úıirmeleri turaqty túrde jolǵa qoıylǵan. Jattyqtyrýshylar da jetkilikti. Barsha sportsúıer qaýymdy jankúıer bolýǵa shaqyramyn. Jarys óte tartysty bolady. Sebebi, oq boıy ozyp shyqqan úzdikter ulttyq quramaǵa iriktelip alynyp, 2020 jyly Tokıoda bolatyn Olımpıadaǵa barady», - deıdi Marat Ormanov.