Bokstan Qazaqstan chempıonatynyń tórtinshi jarys kúni qalaı ótti
ASTANA. KAZINFORM — Taraz qalasynda bokstan eresekter arasyndaǵy Qazaqstan chempıonatynyń tórtinshi jarys kúni máresine jetti.
Búgin erler arasynda 55, 60, 80, 90, +90 keli jáne áıelder arasynda 51, 57, 70, +80 keli salmaq dárejesinde jartylaı fınalıster anyqtaldy.
Sensatsııalar
60 kelide Jetisý oblysynyń jas boksshysy Ádilbek Qojahan kezekti sensatsııasyn tirkedi. Ol 2024 jylǵy Qazaqstan chempıony Talǵat Syrymbetovten (Qaraǵandy obl) úsh raýnd boıy basym túsip, jartylaı fınalǵa joldama aldy. Endi 19 jastaǵy boksshy álem chempıony, bıylǵy Azııa chempıony Orazbek Asylqulovpen kezdesedi.
Áıelder arasynda bir apta buryn ǵana U19 álem chempıonatynyń kúmis júldegeri atanǵan Alına Qudaıgenova (Qaraǵandy obl) shırek fınalda qarsylasyn aıqyn basymdyqpen jeńip, eresekter arasyndaǵy el chempıonatynyń jartylaı fınalyna alǵash ret shyqty. Onyń kelesi qarsylasy – jastar arasynda álem chempıony, byltyrǵy Qazaqstan chempıony Uljan Sársenbek.
Basty jekpe-jekter
55 kelide Tımýr Qabdeshov (Aqmola obl) úsh raýnd boıy joǵary qarqynda ótken tartysty aıqasta keıingi eki Qazaqstan chempıonatynyń fınalısi Bekzat Aldamjarovtan (Aqtóbe obl) aılasyn asyrdy.
80 kelide jastar arasynda álem chempıony Sanjar-Álı Begalıev (Shymkent q) 2024 jylǵy Qazaqstan chempıony Azamat Bektasqa (Qyzylorda obl) qarsy jarqyn óner kórsetip, 5:0 esebimen senimdi jeńiske jetti.
75 kelide álem chempıonatynyń fınalısi Ábilhan Amanqul (Jambyl obl) osy salmaqta uzaq jyldar boıy kóshbasshylardyń biri bolǵan Nurqanat Raıysqa (Mańǵystaý obl) esh múmkindik bermedi. Esep: 5:0.
80 kelide jastar arasynda álem chempıony Óner Seıilhan (BQO) U22 sanatyndaǵy Azııa chempıony Baqbergen Álıasqarǵa (Astana q) qarsy saýatty taktıkalyq boks kórsetti. Qarsylasynyń soqqylarynan sheber qorǵanyp, qarymta shabýyldar arqyly upaı jınaǵan ol jartylaı fınalǵa ótti.
Áıelder arasynda álem chempıony, 38 jastaǵy Lázzat Kúńgeıbaeva (Astana q) jarys jolyn aıaqtady. Ol 2025 jyly Lıverpýlde ótken álem chempıonatynyń fınalısi Eldana Talıpovaǵa ese jiberdi.
Favorıtter
50 kelide Danııal Sábıt qarsylasynan aıqyn basym túsip, sheberligin taǵy bir márte dáleldedi.
55 kelide Nursultan Altynbek tartysty jekpe-jekte kezekti jeńisine qol jetkizse, 60 kelide Bıbarys Jeksen jastar arasyndaǵy álem chempıonatynyń fınalısi Janseri Kósherbaevty (Aqtóbe obl) jarys jolynan shyǵardy.
65 kelide Ertýǵan Zeınýllınov, Muhammedsabyr Bazarbaıuly, Abzal Serik jáne Nurıslam Qaldybaev jeńisti jolyn jalǵastyrdy.
Sondaı-aq Erasyl Jaqpekov (80 keli), Saǵyndyq Toǵambaı (90 keli) jáne Dáýlet Tólemisov (90 keli) kelesi kezeńge joldama aldy.
Aıta keteıik, Tarazdaǵy Qazaqstan chempıonaty 6 qarashaǵa deıin jalǵasady.
Taraz qalasynda bokstan eresekter arasyndaǵy Qazaqstan chempıonatynyń úshinshi jarys kúni qalaı ótkenin jazǵan edik.
