Bokstan Qazaqstan chempıonatynyń alǵashqy kúni qalaı ótti
ASTANA. KAZINFORM — Taraz qalasynda bokstan eresekter arasyndaǵy Qazaqstan chempıonatynyń alǵashqy oıyn kúni ótti.
El birinshiligi 30 qazan-6 qarasha aralyǵynda Taraz qalasynda bolady. Aldymen 29 qazanda jerebe tartý rásimi ótkizilse, boksshylar 30 qazan - 1 qarashada aldyn-ala jekpe-jekte synǵa túsedi. Odan keıin 2-3 qarashada shırek fınal bolsa, 4-5 qarashada jartylaı fınal belgilengen. Al 6 qarashada boksshylar fınalda bas júldeni sarapqa salady.
Erler básekesinde barlyq 20 óńir qatyssa, áıelder saıysynda 18 óńir (Aqtóbe men Abaı oblysynan basqa) synǵa túsedi.
Qazaqstan boks federatsııasynyń málimetinshe, kúndizgi sessııada 55 kelidegi Baǵlan Kenjebek, Jandáýlet Sársenbaev pen Nurıslam Beken jeńiske jetti.
Al keshki sessııada álem chempıony, bıylǵy Azııa chempıony Orazbek Asylqulov (60 keli), sondaı-aq Bıbarys Jeksen, Talǵat Syrymbetov, Dáýlet Moldashev, Rýslan Kúzeýbaev jáne Darhan Dúısebaı (70 keli) kelesi kezeńge joldama aldy.
50 kelide keıingi eki Qazaqstan chempıonatynyń fınalısi, bıyl 55 kelige aýysqan Bekzat Aldamjarov alǵashqy jekpe-jegin uzaqqa sozbady. Ol Vladıslav Plkhanovty (SQO) birinshi raýndta-aq aıqyn basymdyqpen jeńdi.
Al 75 kelide byltyr kúmis júldeger atanyp, bıyl 85 kelige aýysqan Tımýr Nurseıitovke (Astana qalasy) alǵashqy aıqasynda qıyndyq týmady. Ol ekinshi raýndta Nurasyl Kárimbekti (ShQO) jekpe-jekti jalǵastyrý múmkindiginen aıyrdy.
22 jasqa deıingi sportshylar arasynda Azııa chempıony atanǵan Kenje Muratuly men 60 kelidegi «Hıjnıak» laqap atymen tanylǵan Asyljan Serikbaı alǵashqy raýndta qarsylastaryna jol bergenimen, sheshýshi raýndta kezdesýdiń barysyn óz paıdasyna ózgerte aldy.
Alǵashqy jarys kúninde jastar sanatynda ózderin tanytyp úlgergen birqatar boksshy da óner kórsetti.
55 kelide jastar arasyndaǵy Azııa chempıony Dosymjan Tańatar, 65 kelide jastar arasyndaǵy álem chempıonatynyń qola júldegeri Álıhan Ásker qarsylastarynan basym túsip, kelesi kezeńge ótti.
Al 60 kelide jasóspirimder arasyndaǵy álem chempıonatynyń qola júldegeri Nyǵmet Nyǵman, jasóspirimder arasyndaǵy álem chempıony Nurasyl Tólebek jáne Azııa chempıony Aldııar Bahadúr alǵashqy aınalymda jarys jolyn aıaqtady.
Aıta keteıik, Qazaqstan chempıonaty 6 qarashaǵa deıin jalǵasady.
