Bokstan Qazaqstan birinshiliginiń elordalyq jeńimpazdary men júldegerleri S.Seıfýllın atyndaǵy QazATÝ-da kezdesý ótkizdi
ASTANA. Qańtardyń 27-si. QazAqparat /Gúlmıra Álıakparova/ - Keshe Astanadaǵy S.Seıfýllın atyndaǵy Qazaq agrotehnıkalyq ýnıversıtetinde ústimizdegi qańtardyń 16-23-i kúnderi aralyǵynda ótken bokstan Qazaqstan birinshiliginiń jeńimpazdarymen jáne júldegerlerimen kezdesý ótti,
dep habarlaıdy QazAqparat.
Kezdesýge Qazaqstan birinshiliginde chempıon atanǵan S.Seıfýllın atyndaǵy QazATÝ-dyń stýdentteri - Іlııas Súleımenov, Danııar Tólegenov jáne Danııar Eleýsinov, júldeli 3-shi orynǵa taban tiregen Dýman Álimov pen Baqytjan Qojabekovter, sondaı-aq birinshilikte qolǵap túıistirgen ulttyq qurama komandanyń músheleri Mereı Aqshalov, Nursultan Mustafın jáne Azat Qudasov qatysty.
Іs-sharany ashqan ýnıversıtettiń Tárbıe jumystary jáne áleýmettik máseleler jónindegi prorektory Aleksandr Maıer, tek ózderiniń bilim ordalarynyń ǵana emes, Astana qalasynyń namysyn abyroımen qorǵaǵan boksshylarǵa alǵysyn bildirip, aldaǵy ýaqyttary tek jeńis tuǵyrlarynan kórinýlerin tiledi.
«Bul birinshilikte Astana qalasynyń qurama komandasy bizdiń ýnıversıtettiń boksshy stýdentterinen jasaqtalǵanyn maqtanyshpen aıta alamyz», - dep atap ótti ol.
Bokstan elorda qurama komandasynyń vıtse-kapıtany M.Aqshalov pen Qazaqstan chempıondary, qurbylaryna kópshilik jankúıerler men buqaralyq aqparat quraldary bilmegen jáıttar jóninde áńgimelep berdi. Mysalǵa, Beıjiń olımpıadasynyń qatysýshysy M.Aqshalov bul jarystarǵa jaraqaty tolyq jazylmaı qatysqanyn jasyrmady. Al N.Mustafın alǵash ret eresekter quramynda synǵa túsken jáne anaý-mynaý emes, Álem chempıony, óz salmaǵyndaǵy «birinshi qolǵap» - Serik Sápıevpen judyryq túıistirgen. Bul jerde qobaljý da oryn alǵany túsinikti.
Esterińizge sala keteıik, astanalyq bylǵary qolǵap sheberleri Táýelsizdik kúnine oraı Astana men Gavana qalalary arasynda ótken joldastyq kezdesýde namysty qoldan bermeı Bostandyq aralynyń ókilderin jalpy komandalyq esepte 9:2 esebimen oısyrata jeńgen bolatyn. Stýdentter qaýymy qurbylaryna bul iri dodadan keıin qaıta kúsh jınap, birinshilikte tózim men jigerlik kórsetkenderi úshin alǵys aıtty.
