Bokstan Qazaqstan áıelder quramasy oqý-jattyǵý jıynyna kiristi

ASTANA. KAZINFORM - Bokstan Qazaqstan áıelder quramasy 2026 jyldyń kúntizbelik jospary boıynsha alǵashqy oqý-jattyǵý jıynyna kiristi.

Qazaqstan boks federatsııasynyń habarlaýynsha, daıyndyq Bas jattyqtyrýshy Eldos Saıdalınniń jetekshiligimen júrgizilip jatyr. Bylǵary qolǵap sheberleri qańtar aıynyń sońyna deıin Almaty oblysyndaǵy sport bazasynda jalpy dene daıyndyǵyna kóńil bólip, ári qaraı shetelge attanady.

Bıylǵy basty dodanyń biri - Azııa oıyndary. Japonııada 19 qyrkúıek-4 qazan aralyǵynda ótetin qurlyqtyq básekede elimizdiń bylǵary qolǵap sheberleri de synǵa túsedi. Sondaı-aq Mońǵolııada 28 naýryz-11 sáýir aralyǵynda erler men áıelder arasynda Azııa chempıonaty jalaýyn kóteredi.

Álem kýbogi kezeńderi sáýir, maýsym aılarynda Brazılııa men Qytaıda ótse, fınal qarasha, jeltoqsanda Ózbekstanda bolady dep josparlanǵan.

Byltyr elimizdiń áıelder quramasy úshin tabysty jyl boldy. Aldymen naýryz aıynda Serbııanyń Nısh qalasynda IBA aıasynda ótken álem chempıonatynda Nazym Qyzaıbaı (48 keli), Alýa Balqybekova (50 keli), Aıda Ábikeeva (63 keli) altyn alsa, Vıktorııa Grafeeva (60 keli), Eldana Tálipova (81 keliden joǵary) kúmis, Natalıa Bogdanova (70 keli) qola júldeger boldy.

Qyrkúıek aıynda Anglııanyń Lıverpýl qalasynda World Boxing aıasynda ótken dúbirli dodada Alýa Balqybekova (51 keli), Aıda Ábikeeva (65 keli), Natalıa Bogdanova (70 keli) álem chempıony atansa, Nazym Qyzaıbaı (48 keli) kúmis, Vıktorııa Grafeeva (60 keli), Eldana Tálipova (80 keliden joǵary) qola júldeger boldy.