Bokstan Qazaqstan áıelder quramasy Azııa chempıonatyna daıyndyǵyn bastady
ASTANA. KAZINFORM – Bokstan Qazaqstan áıelder quramasy Almaty oblysynda oqý-jattyǵý jıynyn bastady. Bul týraly ulttyq quramanyń bas bapkeri Eldos Saıdalın federatsııanyń baspasóz qyzmetine bergen suhbatynda aıtty.
– Almaty oblysynda kezekti oqý-jattyǵý jıynyna kiristik. Bul – Mońǵolııada ótetin Azııa chempıonatyna qorytyndy daıyndyǵymyz. Bul joly bizge Reseı, Túrkııa, Germanııa, Shvetsııa, Shveıtsarııa boksshylary qosyldy. Oqý-jattyǵý jıynyn nátıjeli ótkizemiz degen jospar bar. Alda áıelder quramasyn birneshe halyqaralyq jarys kútip tur. Atap aıtqanda, aldaǵy ýaqytta Azııa chempıonaty, Fınlıandııadaǵy halyqaralyq týrnır jáne álem kýbogynyń alǵashqy kezeńinde baq synaımyz, - dedi bas bapker.
Aıta ketsek, budan buryn bas bapker Nurjan Nasanov jetekshiligimen bokstan Qazaqstan erler quramasy Túrkistan oblysynda birlesken oqý-jattyǵý jıynyn bastap ketti. Boksshylar bul ýaqyt aralyǵynda aldaǵy Azııa chempıonatyna daıyndyq júrgizedi. Halyqaralyq deńgeıdegi jattyǵý jıynyna Ózbekstan, Túrkimenstan, Germanııa, Túrkııa quramalary keldi.
Eresekter arasyndaǵy Azııa chempıonaty 28 naýryz-11 sáýir aralyǵynda Mońǵolııa astanasy Ýlan-Batorda ótedi. Birinshilik aldynda sol jerde de birlesken oqý-jattyǵý jıyny uıymdastyrylady.
