Bokstan Italııadaǵy lıtsenzııalyq týrnırge kimder barady
29 aqpan men 12 naýryz aralyǵynda Italııanyń Býsto-Arsıtsıo aımaǵynda bokstan lıtsenzııalyq týrnır ótedi. Ár salmaqta jartylaı fınalǵa shyqqan boksshylar Parıj Olımpıadasynyń joldamasyn qaltaǵa salady. Kazinform bul týraly Olympic.kz-ke silteme jasap habarlaıdy.
Osy oraıda, komandanyń bas bapkeri Myrzaǵalı Aıtjanov lıtsenzııa sarapqa salynatyn jarysqa kimder qatysatynyn aıtty.
«Olımpıadaǵa irikteý týrnırine eldegi sońǵy Spartakıadanyń jeńimpazdary qatysady. Alty boksshyny jarysqa qosamyz. Al Azııa oıyndarynda joldama máselesin sheship qoıǵan Qamshybek Qońqabaevty jattyǵý jıynyna jiberýdi oılastyrdyq», - dedi Aıtjanov.
Óz kezeginde Qazaqstan boks federatsııasynyń atqarýshy dırektory Azız Qojambetov tek qana 63,5 kelide tańdaý bolatynyn jetkizdi.
«Bul salmaqta Ertýǵan Tórenov pen Muhammedsabyr Bazarbaıulynyń bireýi barýy múmkin», - dedi ol.
Aıta ketelik, bokstan Qazaqstan komandasynyń qorjynynda Olımpıadanyń bir joldamasy bar.
