Bokstan Italııadaǵy lıtsenzııalyq týrnır: Aıtjanov kimderge senim artyp otyr
ASTANA. KAZINFORM – Bokstan Qazaqstan komandasynyń bas bapkeri Myrzaǵalı Aıtjanov Italııada ótetin álemdik lıtsenzııalyq týrnırge qatysatyn boksshylar tizimin jarııalady.
Parıj Olımpıadasynyń joldamasyna talasatyn boksshylar tizimi:
51 keli: Sáken Bıbosynov
57 keli: Mahmud Sabyrhan
63,5 keli: Muhammedsabyr Bazarbaıuly
71 keli: Aslanbek Shymbergenov
80 keli: Nurbek Oralbaı
92 keli: Aıbek Oralbaı
Eske sala keteıik, bokstan Qazaqstan erler komandasynyń enshisinde ázirge bir joldama bar. 2023 jylǵy jazǵy Azııa oıyndarynda asa aýyr salmaqtaǵy Qamshybek Qońqabaev Parıj lıtsenzııasyn qorjynǵa salǵan bolatyn.
Bokstan Qazaqstan komandasy qazirgi tańda irikteý týrnıri qarsańyndaǵy jattyǵý jıynyn ótkizip jatyr. Italııadaǵy irikteý týrnıri 29 aqpan pen 12 naýryz aralyǵynda ótedi.
«Bul Italııada ótetin týrnır bıylǵy jylǵy lıtsenzııa taratatyn alǵashqy jarys. Men Qońqabaevtan basqa boksshymdy alyp bara jatyrmyn. Basty maqsatymyz – barynsha kóbirek joldamaǵa qol jetkizý. Jalpy Italııada 49 joldama sarapqa salynady. Odan keıin Taılandta ótetin lıtsenzııalyq týrnır bar. Osy eki týrnırden tolyq joldama alýdy kózdep otyrmyz», - dedi bas bapker Myrzaǵalı Aıtjanov saýalymyzǵa.
Aıta keteıik, dál qazirge deıin Qazaqstan qorjynynda Parıj Olımpıadasynyń 8 sport túrinen 19 lıtsenzııasy bar (sadaq atý – 4, tas joldaǵy velosport – 3, nysana kózdeý – 5, qazirgi bessaıys – 2, boks – 2, grek-rım kúresi – 1, erkin kúres – 1, sporttyq gımnastıka – 1).
