Bokstan Groznyı týrnıri: Levıt qarsylas shaq keltirmedi

QOSTANAI. QazAqparat - Qazaqstandyq boksshy Vasılıı Levıt Sheshenstan Respýblıkasynyń astanasy Groznyıda ótken halyqaralyq týrnırde chempıon atandy, dep habarlaıdy QazAqparat tilshisi.

Qostanaılyq boksshy 91 keli salmaqta kúsh synasty. Birinshi jekpe-jeginde reseılik Nazarbek Shamılovty utty. Munan soń ol rıng ıesi Saıhan Bakaevtan basym túsip, fınalǵa shyqty.

«Altyn» úshin talasta Levıtke reseılik Shamıl Mansýrov qarsy turdy. Alaıda, tájirıbeli qazaqstandyq qarsylasyn nebári ekinshi raýndta nokdaýnǵa jiberdi. Kezdesý Vasılıı Levıttiń paıdasyna sheshildi. 

«Groznyıda Ahmat-Hadjı Kadyrovtyń qurmetine arnalǵan halyqaralyq boks týrnıri aıaqtaldy. Men úsh kezdesý ótkizip, qýanyshyma oraı, barlyǵynda jeńiske jettim. Quttyqtaýlaryńyz ben qoldaýlaryńyz úshin rahmet», - dep jazdy boksshy Instagram-daǵy paraqshasynda.