Bokstan Azııa oıyndaryna qatysatyn Qazaqstan áıelder quramasynyń tizimi jarııalandy
ASTANA. KAZINFORM – Bokstan Qazaqstan áıelder quramasy eki Álem kýbogynyń kezeńin qorytyndylap, 2026 jylǵy jazǵy Azııa oıyndaryna daıyndyqtyń alǵashqy kezeńine aıaq basty.
Bul týraly ulttyq quramanyń bas bapkeri Eldos Saıdalın Olympic.kz saıtyna bergen suhbatynda aıtyp berdi.
Sońǵy ret Qazaqstan áıelder quramasy Qytaıdyń Gýııan qalasynda ótken álem kýbogy kezeńinde óner kórsetti. Sol básekede Nazym Qyzaıbaı (54 kelige deıin), Vıktorııa Grafeeva (60 kelige deıin) altyn alsa, Aıda Ábikeeva (65 kelige deıin), Valerııa Aksenova (80 kelige deıin) jáne Dına Islambekova (80 keliden joǵary) jarysty qola medalmen aıaqtady.
Endi ulttyq qurama 2026 jylǵy Azııa oıyndaryna daıyndyqty bastady. Bas bapker Eldos Saıdalın qurlyqtyq jarysqa baratyn sportshylardyń esimin atap, irikteý júıesi jaıly aıtyp berdi.
-Qazirgi tańda Azııa oıyndaryna qatysatyn boksshylardyń tizimi tolyq anyqtaldy. Atap aıtsaq, Alýa Balqybekova (51 kelige deıin), Nazym Qyzaıbaı (54 kelige deıin), Vıktorııa Grafeeva (60 kelige deıin), Aıda Ábikeeva (65 kelige deıin), Natalııa Bogdanova (75 kelige deıin). Sportshylardy irikteý barysynda ótken jylǵy álem chempıonatynyń, bıylǵy álem kýbogy kezeńderiniń nátıjeleri eskerildi, - dedi maman.
Eldos Saıdalın Azııadaǵy áıelder boksynyń damý qarqynyna baǵa berip, qurlyqtaǵy jetekshi quramalardyń áleýetine toqtaldy. Sonymen qatar ulttyq quramanyń aldaǵy daıyndyq jospary men negizgi kezeńderi týraly aıtyp berdi.
-Azııada áıelder boksy qarqyndy damyp keledi. Bul qurlyqta myqty qarsylastar óte kóp. Mysaly, Qytaı men Úndistan quramalaryn atap ótýge bolady. Qazir ulttyq qurama AQSh-ta oqý-jattyǵý jıynyn ótkizip jatyr. 4 tamyzda elge oralamyz. Odan keıin sportshylar jeke daıyndalyp, azdap tynyǵady. Al 16 tamyzda kezekti oqý-jattyǵý jıyny bastalady. Oǵan Reseı men AQSh quramalary qatysady. 9 qyrkúıekte Japonııaǵa attanamyz. Sol jerde sheshýshi daıyndyq kezeńi ótedi, - dedi Eldos Saıdalın.
Sonymen qatar Eldos Saıdalın aldaǵy Azııa oıyndary qarsańynda ulttyq quramanyń basty maqsatyna toqtalyp, sportshylardyń qazirgi daıyndyǵyna baǵa berdi.
-Barlyǵy josparǵa saı júzege asyp jatyr. Qyzdardyń kóńil kúıi jaqsy, densaýlyqtary qalypty, eshkimniń jaraqaty joq. Biz jarysqa tek joǵary nátıje kórsetý úshin baramyz. Árbir sportshy óz múmkindigin tolyq paıdalanyp, bar kúshin salýǵa daıyn. Sondyqtan aldaǵy synnan joǵary nátıje kútemiz, - dep túıindedi bas bapker.
Osyǵan deıin kúres túrlerinen U20 álem chempıonatyna qatysatyn balýandar anyqtalǵan bolatyn.
