Bokstan Azııa chempıonaty: Vasılıı Levıt Iran sportshysyn jeńdi

NUR-SULTAN. QazAqparat - Bokstan Azııa chempıonatynda úsh boksshy jarysty jalǵastyrýǵa múmkindik aldy, dep habarlaıdy QazAqparat tilshisi.

Eske salsaq, Azııa chempıonaty Birikken Arab ámirliginiń Dýbaı qalasynda 24 mamyrda bastaldy. Ol 31 mamyrǵa deıin jalǵasady.

Búgin jigitter arasynda úsh boksshymyz oıyn kórsetti. Qazaqstandyq Danııal Sábıt (49 keli) alǵashqy jekpe- jegin sátti ótkizip, ındonezııalyq Kornelıs Kvanga Langanyń osal tusyn tapty. Tóreshiler biraýyzdan onyń jeńisine qoldaý bildirdi. Taǵy bir qazaqstandyq Vasılıı Levıt (91 keli) ırandyq Ehsan Rýzbahanıden myqtylyǵyn tanytty.

Al Zakır Safıýllın (64 keli) jartylaı fınalǵa jete alǵan joq. Shırek fınalda ol Baatarsýhıın Chınzorıgke ese jiberdi.

Aıta keteıik, qurlyqtyq dodanyń alǵashqy irikteý kezeńinde Mahmýd Sabyrhan (56 keli) men Serik Temirjanov (60 keli) jarys jolynan shyǵyp qaldy.

Sondaı-aq, qyzdar arasynda Nazym Qyzaıbaı (51 keli) shırek fınaldy sátti ótkizip, ózbekstandyq Tursynaı Rahımovany jeńip ketti.