Bokstan Azııa chempıonaty: Qazaqstan «altyn» kútip otyrǵan salmaqtar alynyp tastaldy
ASTANA. QazAqparat - Bokstan Azııa chempıonatynda Qazaqstan quramasy altyn medal kútip otyrǵan salmaqtar alynyp tastaldy. Bul týraly búgin «Dáýlet» sport kesheninde ótken baspasóz máslıhatynda Qazaqstan ulttyq quramasynyń bas bapkeri Myrzaǵalı Aıtjanov málim etti, dep habarlaıdy QazAqparat tilshisi.
«Árıne, Azııa chempıonaty boıynsha jospar burynǵysha qalady. Ol - komandalyq esepte birinshi oryndy ıelený. Al endi onyń aldynda úsh-tórt altyn medal alamyz dep aıtqanbyz. Endi bul boljam kemıdi. Nege deseńizder, biz altyn medal kútken salmaqtardy Azııa Chempıonatynan alyp tastady. Sol sebepten, aýyz toltyryp aıtpaımyz. Eki altyn medal alýǵa tyrysamyz», - deıdi Myrzaǵalı Aıtjanov.
Ulttyq quramanyń bas bapkeri Azııa Chempıonatynan úsh salmaqtyń nelikten alynyp tastalǵany týraly eshteńe aıta almaıtynyn bildirdi.
Aıta ketsek, bunyń aldynda Myrzaǵalı Aıtjanov Astanada bastalǵan bokstan QR Prezıdenti Kýbogynda úzdik óner kórsetken ulttyq quramanyń boksshylary Azııa Chempıonatynda el namysyn qorǵaıtynyn aıtqan edi.
Eske sala keteıik, búgin Astanadaǵy «Dáýlet» sport kesheninde Qazaqstan Respýblıkasy Prezıdentiniń Kýbogi úshin bokstan VI Halyqaralyq týrnır bastaldy. Boks boıynsha QR Prezıdentiniń Kýbogyna 15 eldiń ókilderi, atap aıtqanda Belarýs, Úndistan, Reseı, Japonııa, Qyrǵyzstan, Mońǵolııa, Qytaı, Fılıppın, Shvetsııa, Tájikstan, Taıland, Túrikmenstan, AQSh, Ózbekstan jáne Qazaqstannyń 180-ge jýyq sportshysy qatysýda. Olardyń 140-y er, 40-y áıel sportshylar.
