Bokstan Azııa chempıonaty: Búgin qyzdar jartylaı fınal kezdesýlerin ótkizedi

Eske salsaq, Azııa chempıonaty Birikken Arab ámirliginiń Dýbaı qalasynda 24 mamyrda bastaldy. Ol 31 mamyrǵa deıin jalǵasady.

Qyzdar arasynda qurlyqtyq dodaǵa barlyǵy on boksshy attanǵan bolatyn. Búgin olardyń arasynan toǵyzy jartylaı fınalda sheberligin kórsetedi. Atap aıtqanda, Alýa Balqybekova (48 keli) úndistandyq Monıka, Nazym Qyzaıbaı (51 keli) Shrı-Lanka ókili Nadeka Pýshpakýmarı, Dına Jolaman (54 keli) úndistandyq Sakshı, Vladıslava Kýhta (57 keli) úndistandyq Jaısmın syndy qarsylastarymen sharshy alańda qolǵap túıistiredi. Al Rımma Volosenko (60 keli) úndistandyq Sımranjıt Bath, Mılana Safronova (64 keli) ózbekstandyq Mohınaboný Abdýllaeva, Marına Volnova (75 keli) ózbekstandyq Mavlýda Movlonova, Farıza Sholtaı (81 keli) úndistandyq Savetı, Lázzat Kúngeıbaeva (81 keliden joǵary) BAÁ-niń ókili Hanan Al-Zeıýdımen kezdesedi. Al Valentına Halzova (69 keli) birden fınalda oıyn kórsetýge múmkindik aldy.

Al jigitter arasynda alty qazaqstandyq boksshy jartylaı fınalda sharshy alańǵa shyǵady. Máselen, Danıal Sábıt (49 keli) fılıppındik Mark Lester Dıýrens, Sáken Bıbosynov (52 keli) úndistandyq Amıt Pangal, Abylaıhan Júsipov (69 keli) mońǵolııalyq Battýmýr Mısheelt, Ábilhan Amanqul (75 keli) ırandyq Seıedshahın Mýsavı syndy qarsylastarymen sheberlik baıqasady.

Al Vasılıı Levıt (91 keli) qyrǵyzstandyq Rýstam Yrysbek ýýlýmen kezdesse, Qamshybek Qońqabaev (91 keliden joǵary) ırandyq Pýrıa Amırımen kúsh synasyp kóredi.

Aıta keteıik, qurlyqtyq dodanyń alǵashqy irikteý kezeńinde Mahmýd Sabyrhan (56 keli) men Serik Temirjanov (60 keli) jarys jolynan shyǵyp qaldy. Al Zakır Safıýllın (64 keli) jartylaı fınalǵa jete almaı, shırek fınalda Baatarsýhıın Chınzorıgke ese jiberdi. Shırek fınalda Bekzat Nurdáýletov (81 keli) ırandyq Meısam Geshlagıge jol berdi.

Jekpe-jekter elorda ýaqytymen 20.00-de bastalady.