Bokstan Azııa chempıonaty: búgin kimder jekpe-jekke shyǵady
NUR-SULTAN. QazAqparat - Bokstan Azııa chempıonatynda búgin, 26 mamyrda bes boksshy sharshy alańǵa shyǵady, dep habarlaıdy QazAqparat tilshisi.
Eske salsaq, Azııa chempıonaty Birikken Arab ámirliginiń Dýbaı qalasynda 24 mamyrda bastaldy. Ol 31 mamyrǵa deıin jalǵasady.
Búgin sharshy alańǵa elimizdiń atynan bes boksshy shyǵady. Olardyń qatarynda Sáken Bıbosynov, Abylaıhan Júsipov, Ábilhan Amanqul, Bekzat Nurdáýletov pen Qamshybek Qońqabaev bar.
Jekpe-jek elorda ýaqytymen 20.00-de bastalady.
Aldymen Sáken Bıbosynov (52 keli) Shrı-Lanka elinen kelgen Lasındý Erandamen qolǵap túıistirse, odan keıin Abylaıhan Júsipov (69 keli) Birikken Arab Ámirliginiń ókili Hýseın Al-Kandarımen sharshy alańǵa shyǵady. Al Ábilhan Amanqul (75 keli) úndistandyq Ashısh Kýmar, Bekzat Nurdáýletov (81 keli) ırandyq Meısam Geshlagı, Qamshybek Qońqabaev (91 keliden joǵary) úndistandyq Narendermen kezdesedi.
Aıta ketsek, keshe, 25 mamyrda qazaqstandyq bes boskshy jarysty jalǵastyrýǵa múmkindik aldy. Qazaqstandyq Danııal Sábıt (49 keli) alǵashqy jekpe- jegin sátti ótkizip, ındonezııalyq Kornelıs Kvanga Langanyń osal tusyn tapty. Tóreshiler biraýyzdan onyń jeńisine qoldaý bildirdi. Taǵy bir qazaqstandyq Vasılıı Levıt (91 keli) ırandyq Ehsan Rýzbahanıden myqtylyǵyn tanytty.
Sondaı-aq, qyzdar arasynda Nazym Qyzaıbaı (51 keli) shırek fınaldy sátti ótkizip, ózbekstandyq Tursynaı Rahımovany, Rımma Volosenko (60 keli) mońǵolııalyq Monhor Namýndy jeńip ketti.
Aıta keteıik, qurlyqtyq dodanyń alǵashqy irikteý kezeńinde Mahmýd Sabyrhan (56 keli) men Serik Temirjanov (60 keli) jarys jolynan shyǵyp qaldy. Al Zakır Safıýllın (64 keli) jartylaı fınalǵa jete almaı, shırek fınalda Baatarsýhıın Chınzorıgke ese jiberdi.
