Bokstan Azııa chempıonaty: 6 qazaqstandyq jarystan shyǵyp qaldy, 4-eýi medal ıelenbek (FOTO)
ASTANA. QazAqparat - Qytaıdyń Ýlanchabe qalasynda bokstan áıelder arasyndaǵy Azııa chempıonatynyń shırek fınaldyq jarystary aıaqtaldy.
Ókinishke oraı, Alına Turlybaeva (48 kelige deıingi salmaqta) jáne Janna Basqaeva (57 kelige deıin) úndistandyq qarsylastaryna jol berdi. Jaına Shekerbekova (51 kelige deıin) men Mádına Nurshaeva (64 kelige deıin) qytaılyqtardan utylyp qaldy. Al Gúljaına Úbbinııazova (60 kelige deıin) soltústikkoreıalyq boksshy qyzdan basym túse almady. Rano Parhatova (54 kelige deıin) bolsa taılandyq qarsylasyn jeńe almady. Osylaısha, jartylaı fınalǵa Gaýhar Ermekbaı (69 kelige deıin), Darıǵa Shákimova (75 kelige deıin), Móldir Bazarbaeva (81 kelige deıin) jáne Lázzat Kúngeıbaeva (81 keliden joǵary) shyqty. Qurlyq birinshiliginen soń qazaqstandyq bokstan áıelder quramasy Astanada 2016 jyldyń basynda ótetin álem chempıonatyna ázirlenetin bolady, dep habarlaıdy QR Boks federatsııasynan.
