Bokstan Azııa chempıonatyna baratyn Qazaqstan áıelder quramasyna kimder endi
ASTANA. KAZINFORM - World Boxing aıasynda Mońǵolııada ótetin Azııa chempıonatynda baq synaıtyn Qazaqstan áıelder quramasy belgili boldy.
Eldos Saıdalın jetekshiligimen qurlyqtyq dodaǵa tómendegi bylǵary qolǵap sheberleri qatysatyn boldy. Olardyń qatarynda Áıgerim Sáttibaeva (48 keli), Jazıra Oraqbaeva (51 keli), Elına Bazarova (54 keli), Uljan Sársenbek (57 keli), Rımma Volosenko (60 keli), Laýra Esenkeldi (65 keli), Baqyt Seıdish (70 keli), Valentına Halzova (75 keli), Nadejda Rıabets (80 keli) jáne Dına Islambekova (80 keliden joǵary) bar.
Aıta ketsek, bokstan Qazaqstan áıelder quramasy Almaty oblysynda oqý-jattyǵý jıynyn ótkizdi. Bul týraly ulttyq quramanyń bas bapkeri Eldos Saıdalın federatsııanyń baspasóz qyzmetine bergen suhbatynda aıtty.
- Almaty oblysynda kezekti oqý-jattyǵý jıynyna kiristik. Bul - Mońǵolııada ótetin Azııa chempıonatyna qorytyndy daıyndyǵymyz. Bul joly bizge Reseı, Túrkııa, Germanııa, Shvetsııa, Shveıtsarııa boksshylary qosyldy. Oqý-jattyǵý jıynyn nátıjeli ótkizemiz degen jospar bar. Alda áıelder quramasyn birneshe halyqaralyq jarys kútip tur. Atap aıtqanda, aldaǵy ýaqytta Azııa chempıonaty, Fınlıandııadaǵy halyqaralyq týrnır jáne álem kýbogynyń alǵashqy kezeńinde baq synaımyz, - dedi bas bapker.
Eresekter arasyndaǵy Azııa chempıonaty 28 naýryz-11 sáýir aralyǵynda Mońǵolııa astanasy Ýlan-Batorda ótedi.
