Bokstan Azııa chempıonaty: Qazaqstan jastar quramasy birinshi orynǵa ıe boldy

Astana qalasynda bokstan jasóspirimder men jastar arasynda Azııa chempıonaty máresine jetti, dep habarlaıdy Kazinform. 

Jarystyń sońǵy kúni jastar arasynda 25 salmaq (13 ul, 12 qyz) boıynsha jeńimpazdar anyqtaldy.

Qazaqstan quramasy 9 altyn, 3 kúmis, 8 qolamen jalpy kestede kósh bastasa, Ózbekstan (8 altyn, 8 kúmis, 4 qola) ekinshi, Úndistan (6 altyn, 8 kúmis, 6 qola) úshinshi orynnan kórindi.

Jas jigitter arasynda fınalda birinshi bolyp sharshy alańǵa shyqqan Beksultan Boranbek (48 kg) japonııalyq Seıa Nakaıamaǵa 0:5 esebimen ese jiberdi.

Esesine Baqtııar Anarbaev (60 kg) ózbekstandyq Saıat Ilıasovti tóreshilerdiń biraýyzdan sheshimimen utty.

Tórehan Sabyrhan 63,5 kelige deıingi salmaqta úndistandyq Sıngh ıAshvardhandy aıqyn jeńdi – 5:0. Álem chempıony Mahmud Sabyrhannyń inisi osymen ekinshi ret jastar arasynda Azııa chempıony atandy.

Islam Sovetov (71 kg) qyrǵyzstandyq Vadım Baýrındi (5:0) súrindirse, Dáýlet Tólemisovtiń (80 kg) ózbekstandyq Javohır Ýmmatalıevke shamasy kelmedi.

Sondaı-aq Vıktor Lıtvınov (86 kg) taǵy bir ózbekstandyq Abdýlazız Abdýrahmanovtan aılasyn asyra almady.

Eń sońǵy básekede Ivan Ermolenko (+92 kg) ózbekstandyq Shahzod Polvonovpen aıqasta jeńis núktesin qoıdy.

Jarys jeńimpaz-júldegerleri Halyqaralyq boks federatsııasy tarapynan (1-oryn – 1000$, 2-oryn – 500$, 3-oryn – 250$) aqshalaı syıaqymen marapattaldy.

Qazaqstan boks federatsııasynan málim etkenindeı, 12 kúnge sozylǵan týrnırdiń qorytyndysynda arnaıy atalymdar boıynsha mynadaı júldeler berildi:

Eń úzdik jasóspirim qyz boksshy – Aıajan Sydyq (Qazaqstan),

Eń úzdik jasóspirim ul boksshy – Fýjýkı ıÝga (Japonııa),

Eń úzdik jas qyz boksshy – Oltınoı Sotımboeva (Ózbekstan),

Eń úzdik jas ul boksshy – Tórehan Sabyrhan (Qazaqstan).

Eń úzdik tóreshi – Marıf Ýrdeshev (Ózbekstan), Marııa Kavaklıeva (Bolgarııa).

Eske sala keteıik, budan buryn bokstan Azııa chempıonatynda Qazaqstannyń boksshy qyzdary bir kúnde 5 altyn alǵanyn jazǵan bolatynbyz.