Bokstan Azııa chempıonaty: Áıgerim Sáttibaeva qola júldeger atandy

ASTANA. KAZINFORM - Taıland koroldiginiń Chıangmaı qalasynda bokstan erler jáne áıelder arasynda ótip jatqan Azııa chempıonatynda Qazaqstannan alǵashqy bolyp Áıgerim Sáttibaeva jartylaı fınaldyq jekpe-jegin ótkizdi.

Á.Sáttibaeva 48 kelige deıingi salmaqta ózbekstandyq Farzona Fozılovamen sheberlik baıqasty.

Eki boksshy da aıanyp qalǵan joq. Tóreshiler sheshimimen jeńis ózbekstandyq sportshyǵa berildi - 4:1.

Osylaısha, uzaq jylǵy úzilisten keıin sportqa qaıta oralǵan bes balanyń anasy, belgili boksshy Oljas Sáttibaevtyń zaıyby Áıgerim qola júldeni qanaǵat tutty. Bul - onyń sporttyq jolyndaǵy Azııa chempıonatynda alǵan ekinshi qola medali.

Eske sala keteıik, budan buryn bokstan Azııa chempıonatynda 9 qazaqstandyqtyń fınalǵa shyǵý úshin talasatynyn jazǵan bolatynbyz.