Bokstan áıelder quramasynyń bas bapkeri aýysty
ASTANA. KAZINFORM – Áıelder boksynan Qazaqstan ulttyq quramasynyń bas bapkeri aýysty. Endi burymdy boksshylarymyzdy aldaǵy ýaqytta Eldos Saıdalın baptamaq.
QR Boks federatsııasy málim etkendeı, Qazaqstan áıelder quramasynyń bas bapkeri bolyp Saıdalın Eldos Jánibekuly taǵaıyndaldy.
Onyń bapkerlik ótili 16 jyldan astam. Qaraǵandy oblysy balalar men jasóspirimderdiń mamandandyrylǵan sport mektebinde jattyqtyrýshy bolǵan.
2020 jyldan beri áıelder boksynan Qazaqstan jastar jáne jasóspirimder quramalarynyń aǵa bapkeri.
Onyń jetekshiligimen 2021 jylǵy Álem chempıonatynda qyzdarymyz 2 kúmis, 3 qola medal enshilegen.
2022 jyly Álem chempıonatynda jastar quramasy 2 altyn, 2 kúmis, 3 qola medal jeńip aldy. Al 2023 jyly Astanada ótken jastar jáne jasóspirimder arasyndaǵy Azııa chempıonatynda Qazaqstan qyzdary el qorjynyna 8 altyn, 4 kúmis jáne 9 qola medal saldy. Sondaı-aq, byltyr Armenııada ótken jasóspirimder arasyndaǵy dúnıejúzilik dodada 3 altyn, 5 qola medal jeńip aldy.
Al osyǵan deıin Qazaqstan qyzdar boks quramasynyń bas bapkeri bolǵan Shamıl Safıýllın qyzmetinen ketti.
