Bokstan áıelder arasyndaǵy álem chempıonatynda Qazaqstan quramasy kúmis jáne qola medal aldy
ASTANA. Qyrkúıektiń 21-i. QazAqparat - Bokstan áıelder arasyndaǵy álem chempıonaty ótken Barbadostan Astanaǵa Qazaqstan quramasy oraldy.
Bizdiń sportshylar jaqsy nátıje kórsetti - 81 keli salmaqta Marına Volnova chempıonattyń kúmis medalin qanjyǵalasa, 48 keli salmaqta Nazgúl Boranbaeva qola júldeger atandy. Nazgúl 2006 jylǵy álem chempıonatynda da úshinshi oryndy jeńip alǵan bolatyn, dep habarlady Astana qalasynyń týrızm, dene shynyqtyrý jáne sport basqarmasynan.
Elordalyq sport basqarmasynyń uıymdastyrýymen jáne júldegerlerdiń, bokstan Qazaqstan quramasynyń aǵa jattyqtyrýshysy Vadım Prısıajnıýk pen Astana qalasynyń aǵa jattyqtyrýshysy Beıbit Masabaevtyń qatysýymen búgin «Qazaqstan» sport saraıynda baspasóz máslıhaty ótti.
- Bul áıelder boksynyń tarıhyndaǵy eń ókiletti týrnır boldy. Oǵan álemniń 76 elinen 378 sportshy qatysty. Jartylaı fınalǵa 21 el qatyssa, fınaldyq kezdesýlerdi 13 eldiń ókilderi asyǵa kútti. Olardyń qatarynda Qazaqstan da bar. Bizdiń qyzdar júldeli oryndar aldy, - dedi bokstan Qazaqstan quramasynyń aǵa jattyqtyrýshysy Vadım Prısıajnıýk baspasóz máslıhatynda bergen suhbatynda.
