Bokstan áıelder arasyndaǵy ÁCh: Bas bapker basty qarsylastardy atady

ASTANA. QazAqparat – Búgin Úndistanda alaýy tutanatyn bokstan áıelder arasyndaǵy álem chempıonaty aldynda Qazaqstan ulttyq quramasynyń bas bapkeri Shəmil Safıýllın sportshylarymyzdyń basty qarsylastaryn atady, dep habarlaıdy QazAqparat tilshisi.

«Bizdiń basty qarsylastarymyz – Úndistan, Qytaı, Reseı jáne Ózbekstannyń boksshy qyzdary. Áıelder boksynda biz buryn estimegen kóptegen el bar. Qazir bul sport, ásirese, Afrıka qurlyǵynda qarqyndy damyp keledi», - dep atap ótti Shəmil Safıýllın.

Ol sondaı-aq, bul óziniń bas bapker retinde ekinshi álem chempıonaty ekenin, oqý-jattyǵý jıyndaryn sátti ótkizgenin, júldeli oryndarǵa talasa alatynyn da aıtty.

«Men úshin bul – ekinshi álem chempıonaty. Júldeli oryndarǵa ıe bolýǵa barynsha tyrysamyz. Bizdiń sportshylarymyzdyń kóbi álem reıtınginde ondyqta ekenin atap ótkim keledi. Atap aıtar bolsam, Alýa Balqybekova óz salmaǵynda kósh bastap tur. Al Jaına Shekerbekova men Karına Ibragımova – ekinshi orynda», - dedi ol.

Aıta keteıik, álemdik doda 15-26 naýryz aralyǵynda Úndistan astanasy Nıý-Delı qalasynda ótedi.

Búgin, ıaǵnı 15 naýryzda týrnırdiń ashylý saltanaty, jerebe tartý rásimi jáne salmaq ólsheý sharasy uıymdastyrylady. Al erteń alǵashqy irikteý saıystary bastalady.

Atalǵan dodada el namysyn qorǵaıtyn boksshylar:

- Alýa Balqybekova (48 keli),

- Nazym Qyzaıbaı (50 keli),

- Jazıra Oraqbaeva (52 keli),

- Jaına Shekerbekova (54 keli),

- Karına Ibragımova (57 keli),

- Rımma Volosenko (60 keli),

- Aıda Ábikeeva (63 keli),

- Nadejda Rıabets (66 keli),

- Madına Nurshaeva (70 keli),

- Valentına Halzova (75 keli),

- Farıza Sholtaı (81 keli),

- Lıazzat Kúngeıbaeva (81 keliden joǵary).