Bokstan áıelder arasynda Qazaqstan chempıondary belgili boldy
Iordanııada olımpıada joldamasy úshin ótken týrnırde Qazaqstannan jalǵyz joldamany utyp alǵan qostanaılyq Nadejda Rıabets 75 kg salmaqta London olımpıadasynyń qola júldegeri, elordalyq Marına Volnovamen qolǵap túıistirdi.
Rıngke bes jylǵy úzilisten keıin qaıta oralǵan Qazaqstannyń eńbek sińirgen sport sheberi M.Volnova 31-de bolsa, qarsylasy odan baqandaı 11 jasqa kishi edi.
Bul básekede tóreshiler jeńisti biraýyzdan N.Rıabetske berdi.
Shymkenttik Farıza Sholtaı men qaraǵandylyq Vıoletta Knıazeva 81 kg salmaqta chempıondyq ataqty sarapqa saldy. Munda F.Sholtaı qazylardyń biraýyzdan sheshimimen jeńimpaz atandy.
Asa aýyr salmaqta (81 kg joǵary) elordalyq, 2016 jylǵy álem chempıony Lázzat Kúngeıbaeva men taǵy bir shymkenttik Dına Islambekova sharshy alańǵa shyqty.
Lázzat 32-ge tolsa, 20 jastaǵy Dına jastar arasynda álem birinshiliginde top jarǵan bolatyn. L.Kúngeıbaeva 4:1 esebimen kezekti ret el chempıony atandy.
Osylaısha áıelder arasynda barlyq jeńimpazdar belgili boldy. Erler arasynda fınaldyq báseke bastaldy.
Eske sala keteıik, budan buryn fınalǵa shyqqan boksshylardyń anyqtalǵanyn, Nazym Qyzaıbaıdyń Tokıo olımpıadasynyń joldamasyn jeńip alǵysy keletinin jazǵan bolatynbyz.
Sondaı-aq Valentına Halzova olımpıada júldegerin utty.