Bokstan áıelder arasyndaǵy Qazaqstan chempıonatynda fınalǵa kimder shyqty
ASTANA. KAZINFORM - Taraz qalasynda ótip jatqan bokstan Qazaqstan chempıonatynda áıelder arasynda jartylaı fınal máresine jetti.
Qazaqstan boks federatsııasynyń málimetinshe, 57 kelide Almaty qalasynyń ókili Shahnaz Isaeva álem chempıonatynyń birneshe márte júldegeri Karına Ibragımovany sensatsııalyq túrde jeńdi. Esep: 3:2.
Asa aýyr salmaqta da kútpegen nátıje tirkeldi. Birshama ýaqyt úzilisten keıin sharshy alańǵa oralǵan 2025 jylǵy álem chempıonatynyń kúmis júldegeri Eldana Talıpova osy salmaqtyń kóshbasshysy Valerııa Aksenovamen tartysty jekpe-jek ótkizip, jeńisti óz enshisine jazdy.
Esep: 4:1.
54 kelide kópshilik asyǵa kútken kezdesý ótti. Úsh dúrkin álem chempıony Nazym Qyzaıbaı men álem chempıonatynyń birneshe márte júldegeri Jaına Shekerbekova araǵa 7 jyl salyp, sharshy alańda qaıta jolyqty. Tájirıbeli boksshylar arasyndaǵy básekede Nazym Qyzaıbaı tóreshilerdiń biraýyz sheshimimen jeńiske jetip, fınalǵa joldama aldy.
60 kelide álem kýbogynyń úsh dúrkin jeńimpazy Vıktorııa Grafeeva byltyrǵy Qazaqstan chempıony Rımma Volosenkomen qolǵap túıistirdi. Nátıjesinde Vıktorııa basymdyq tanytyp, 5:0 esebimen jeńiske jetti.
65 kelide eki dúrkin álem chempıony Aıda Ábikeeva da qarsylasyna múmkindik qaldyrmady. Ol Batys Qazaqstan oblysynyń ókili Aqnar Işanovany 5:0 esebimen jeńdi.
Eń jeńil 48 kelide bes balanyń anasy Áıgerim Sáttibaeva jastar arasyndaǵy Azııa chempıony Aıym Táńkibaevamen (Túrkistan obl) judyryqtasty. Tájirıbeli boksshy sheberligin kórsetip, 5:0 esebimen jeńiske jetti.
80 kelide Nadejda Rıabets Azııa chempıony Gúlsaıa Erjannan aılasyn asyrdy. Qostanaı oblysynyń ókili úsh raýnd qorytyndysynda 5:0 esebimen basym tústi.
70 kelide bıylǵy Azııa chempıonatynyń kúmis júldegeri Baqyt Seıdish te senimdi óner kórsetti. Ol Anastasııa Baıazıtovany (Qostanaı obl) jeńip, aqtyq synǵa joldama aldy.
80 keliden joǵary salmaqta álem chempıonatynyń qola júldegeri Dına Islambekova Ásel Toqtasynmen kezdesýin merziminen buryn aıaqtady. Ekinshi raýndta Dına aıqyn basymdyqpen jeńiske jetti.
57 kelide jastar arasyndaǵy álem chempıonatynyń kúmis júldegeri Alına Qudaıgenova jekpe-jekke shyqpady. Nátıjesinde Uljan Sársenbek fınalǵa avtomatty túrde ótti.
75 kelide de osyndaı jaǵdaı tirkeldi. Jasmın Qızatova U22 sanatyndaǵy Azııa chempıony Azıza Isınamen ótetin kezdesýge shyqpaı, qola júldege ıelik etti.
Endi 5 qarashada Qazaqstan chempıonatynda erler arasynda jartylaı fınal jekpe-jekteri ótedi.
