Bokstan álemniń eks-chempıony H.Chaves S.Martınespen qarymta kezdesýden góri Golovkınmen judyryqtasýdy qalap otyr
ASTANA. 5 sáýir. QazAqparat - WBC nusqasy boıynsha ortasha salmaqtaǵy álemniń burynǵy chempıony meksıkandyq kishi Hýlıo Sezar Chaves argentındik Serhıo Martınespen qarymta kezdesýdi ótkizýge qyzyǵýshylyq tanytpaı otyrǵanyn málimdedi.
Esesine, WBA/IBO nusqasy boıynsha ortasha salmaqtaǵy qazirgi álem chempıony Gennadıı Golovkınmen qolǵap túıistirýge bekinip otyr. Bul jaıynda BoxingScene.com jelisine silteme jasap, Vesti.kz habarlady.
Eske salaıyq, 2012 jyldyń 15 maýsymynda Chaves sporttyq mansabynda tuńǵysh márte jeńilip, ózine tıesili WBC-diń tıtýlyn Serhıo Martıneske tapsyrdy. Buǵan deıin, Chavestiń promoýteri Bob Arým bıylǵy kúzde Chaves pen Martınes arasynda 2013 jyldyń kúzinde qarymta kezdesý ótýi múmkindigi týraly birneshe márte málimdegen edi. Alaıda onyń sózin bylǵary qolǵap sheberi rastamady.
«Martınespen qaıta kezdesý? Shynymdy aıtsam, ol meni asa qatty qyzyqtyrmaıdy. Bolashaqta jekpe-jek ótkizýim múmkin Martınsten basqa da ortasha salmaqtaǵy aıtarlyqtaı jaqsy boksshylar bar. Gennadıı Golovkın - úzdik boksshy, chempıon ataǵyna saı. Sondaı-aq men Andre Ýordpen kúsh synasýǵa ázirmin. Menińshe, men jáne Martınes arasyndaǵy qarymta kezdesýden góri Golovkın men Ýordqa qarsy jekpe-jek bokstyń jankúıerleriniń úlken qyzyǵýshylyǵyn týdyrady. 22 maýsymda ótetin kezekti kezdesýden keıin atalmysh jekpe-jekke qoljetkizýge tyrysamyn», - dep atap ótti WBC nusqasy boıynsha álemniń eks-chempıony.
