Bokstan álem kýbogynda Nazym Qyzaıbaı fınalǵa shyqty
ASTANA. KAZINFORM — Qytaıdyń Gýııan qalasynda ótip jatqan Álem kýbogynda búgin, 20 maýsymda Nazym Qyzaıbaı (54 keli) fınalǵa joldama aldy.
Jekpe-jek barysynda 3 dúrkin álem chempıony Nazym Qyzaıbaı jartylaı fınalda Taıland boksshysy Natnıcha Chongprongklangpen kúndizgi sessııany ashty.
Alǵashqy raýnd qarsylastyń enshisine ketti. Qalǵan bóliginde otandasymyz shabýyldaǵy belsendiligin arttyryp, tarazy basyn óz jaǵyna bura aldy. Qorytyndy esep: 3:2.
Aıta ketsek, búgin el quramasy taǵy da sharshy alańǵa shyǵady. Olardyń qatarynda 70 kelide Abylaıhan Júsipov ıordanııalyq Zeıad Eashash, 80 keliden joǵary salmaqta Dına Islambekova ózbekstandyq Oltınoı Sotımboeva, 60 kelide Vıktorııa Grafeeva ózbekstandyq Sıtora Týrdıbekovamen qolǵap túıistiredi.
Al 80 kelide Valerııa Aksenova frantsııalyq Davına Mıshel, 50 kelide Sanjar Táshkenbaı ıspanııalyq Martın Molına Salvador, 65 kelide Aıda Ábikeeva brazılııalyq Beatrız Ferreıra, 90 keliden joǵary salmaqta Aıbek Oralbaı brazılııalyq Djoel Ramospen sheberlik baıqasady.
Aıta ketsek, jarystyń atalǵan satysynda Ózbekstan 11, Qytaı — 9, Qazaqstan men Frantsııa — 8 úzdigine úmit artsa, odan keıingi oryndarda Úndistan men Polsha — 6, Anglııa men Brazılııa — 4, Ázerbaıjan men Italııa — 3, AQSh, Bolgarııa, Ońtústik Koreıa, Iordanııa, Ispanııa — 2 sportshysyna senim bildiredi.
Al jartylaı fınalda Aýstralııa, Germanııa, Kanada, Iran, Meksıka, Taıpeı, Taıland jáne Moldovadan 1 bylǵary qolǵap sheberi sharshy alańǵa shyǵady.
