Bokstan álem chempıony Qaırat Eralıev shańyraq kóterdi
ShYMKENT. QazAqparat - Bokstan álem chempıony Qaırat Eralıev shańyraq kóterdi. Sportshynyń úılený toıy keshe Shymkent qalasyndaǵy meıramhanalardyń birinde ótken. Bul týraly bylǵary qolǵap sheberiniń ózi QazAqparat tilshisine aıtty.
Ásem degen arýdy qolyna qondyrǵan boksshynyń dúbirli toıyna sporttaǵy dostary, bapkerler qaýymy, sport ardagerleri, jalpy ıgi jaqsylar kóptep jınaldy. Olar jańadan shańyraq kóterip, otbasyn qurǵan jas jubaılarǵa izgi lebizderin jetkizdi. Boksshynyń jaǵymdy jańalyǵymen ózimen qatar áriptesteri de bólisti. Solardyń biri Ádilbek Nııazymbetov jelide «Qaırat baýyrym, búgin úılenip jatyr. Baqytty bol, sportta eńbegiń sińdi, endi ómirde de halqymyzǵa eńbegiń sińsin», - dep jyly lebizin arnady.
Aıta keteıik, 28 jastaǵy sportshy Shymkenttiń irgesindegi Juldyz aýlynda týyp ósken. Birneshe álemdik dodalarda top jaryp júrgen sportshy 2016 jyly Brazılııanyń Rıo-de-Janeıro qalasynda ótken Olımpıadaǵa qatysyp, 2017 jyly Germanııanyń Gambýrg qalasynda ótken álem chempıontynda álem chempıony atanǵan bolatyn.
Foto: www.instagram.com/niyazymbetovadilbek
