Bokstan álem chempıony Qaırat Eralıev ońtústiktiń jastarymen kezdesti
ShYMKENT. QazAqparat - Ońtústik Qazaqstan oblysynyń týmasy, bokstan álem chempıony Qaırat Eralıev jastarmen jáne mektep oqýshylarmen kezdesti. Oblystyq Jastar resýrstyq ortalyǵynyń uıymdastyrýymen ótken basqosýda sportshy ómir tájirıbesi týraly áńgimelep, alǵa qoıǵan maqsattary men bolashaq josparlarymen bólisti, dep habarlaıdy QazAqparat HAA tilshisi.
Elbasy N. Nazarbaevtyń «Bolashaqqa baǵdar: rýhanı jańǵyrý» maqalasyn jastar arasynda keńinen nasıhattaý maqsatynda uıymdastyrylǵan kezdesý Qajymuqan Muńaıtpasov atyndaǵy ortalyq stadıonnyń boks zalynda ótti. Erkin formatta ótken kezdesýde Qaırat Eralıev jastardy salaýatty ómir saltyn ustanýǵa shaqyryp, turaqty túrde sportpen shuǵyldanýǵa keńes berdi. Olardyń kóptegen túrli saýaldaryna jaýap berdi. Jastardy álem chempıonynyń jeke ómiri qyzyqtyryp, tipti otbasyn qurý máselesin de qozǵap ótti. Kezdesý sońynda Qaırat Eralıev, jastardy ómirlik arman, maqsat úshin kúresýge shaqyryp, jınalǵan jas jetkinshekterdi boks álippesimen tanystyrdy.
Esterińizge sala keteıik, Qaırat Eralıev Germanııanyń Gambýrg qalasynda ótken bokstan álem chempıonatynda jeńiske jetken bolatyn. 56 keli salmaq sanatynda jarys jolyna shyqqan bylǵary qolǵap sheberi fınalda amerıkalyq Dıýk Raganmen judyryq túıistirdi. Tartysty ótken jekpe-jek nátıjesinde tóreshiler jeńisti qazaq boksshysyna berdi.
