Bokstan álem chempıony Qaırat Eralıev alǵashqy áserimen bólisti
ASTANA. QazAqparat - Germanııanyń Gambýrg qalasynda ótip jatqan álem chempıonynda altyn medal alǵan Qaırat Eralıev aqtyq syndy amerıkalyq Dıýk Ragannan basym túsken bolatyn. Osylaısha ol qazaq boksy tarıhynda 11-shi álem chempıony atanyp otyr. Jekpe-jek aıaqtalǵannan keıin Qaırat Eralıev Sports.kz tilshisimen alǵashqy áserin bólisti.
- Maǵan jankúıer bolyp, qoldaý kórsetken halqyma alǵysymdy aıtamyn. Qazaqstannyń týy álemdik arenada munan da joǵary bıikterge kóterile bersin. Qazaqstandyq atletterdiń jeńisi - bul memlekettiń sportshylarǵa degen úlken nazarynyń, aýqymdy jumystarynyń nátıjesi.
- Qarsylasyń qalaı eken?
- Qarsylasym fızıkalyq turǵyda óte myqty bolyp shyqty.
Amerıkalyqtardyń urys máneri kásibıge jaqyn bolyp keledi. Sondyqtan jyldamyraq bolýǵa, ony aldap soǵýǵa tyrystym. Meni jaqsy daıyndap, jeńiske jetýge kómegin bergen bapkerlerge alǵysymdy aıtamyn.
- Bul seniń osy týrnırdegi eń aýyr jekpe-jegiń boldy dep aıtýǵa bola ma?
- Álem chempıonatyndaǵy barlyq jekpe-jek aýyr. Naqty aıqasqa kim myqty bolsa, sol jeńiske jetedi.
- Rıo Olımpıadasymen salystyrǵanda qandaı komponentterde myqty bola tústiń?
- Fızıkalyq turǵyda desem bolady. Jaqsy daıyndalyp, qateliktermen jumys jasadyq. Bizdiń eńbegimiz nátıje bergenine qýanyshtymyn.
Aıta keteıik, álem chempıonatynda 75 keli salmaq sanatynda judyryqtasqan Ábilhan Amanqul aqtyq synynda Eýropa chempıony ýkraınalyq Aleksandr Hıjnıakten utylyp, kúmis medaldi qanaǵat tutqan bolatyn.
Alda 91 keli salmaq sanatynda Qamshybek Qońqabaev ázerbaıjandyq Magomedrasýl Mejıdovpen álem chempıony ataǵy úshin aıqasady.
Aıta keteıik, osyǵan deıin Gambýrgtegi álem chempıonatynda Jomart Erjan (49 keli), Vasılıı Levıt (81 keli) pen Abylaıhan Júsipov (69 keli) qola júldeger atanǵan edi.
