Bokstan álem chempıony Bekzat Nurdáýletov áskerı boryshyn óteýge attandy

AQTAÝ. QazAqparat - Mańǵystaýlyq 32 jas áskerı boryshyn óteýge Shymkent qalasyna attandy. Olardyń ishinde bokstan álem chempıony, mańǵystaýlyq sportshy Bekzat Nurdáýletov te bar, dep habarlaıdy QazAqparat tilshisi.

Sportshy «Ulttyq ulan» qatarynda Otan aldyndaǵy boryshyn óteıdi. Aldaǵy jarystardyń bárine ol ásker qatarynda júrip daıyndalady.

«Ár azamat áskerı boryshyn óteýi tıis dep sanaımyn. Elimizdi abyroımen qorǵap, úıimizge aman-saý kelemiz degen oıdamyn»,-deıdi Bekzat Nurdáýletov.

«QR Ulttyq ulan qataryna Shymkent qalasyndaǵy 6505 áskerı bólimine jibereıin dep jatyr. 32 azamat ketedi. Áskerge shaqyrý naýqany Elbasy jarlyǵyna sáıkes, 2019 jylǵy qyrkúıek aıynynan bastap jeltoqsannyń aıaǵyna deıin jalǵasady»,-deıdi oblystyq qorǵanys isi jónindegi departament basshysynyń orynbasary Shymbolat Aqmuratov.