Bokstan álem chempıony Mereı Aqshalovqa qurmet belgisi tabystaldy

ASTANA. KAZINFORM — Bokstan álem jáne Azııa chempıony, Qazaqstannyń eńbek sińirgen sport sheberi Mereı Aqshalovqa TMD Parlamentaralyq Assambleıasynyń qurmet belgisi tabystady.

Ony belgili boksshyǵa QR Týrızm jáne Sport mınıstrligi Sport jáne dene shynyqtyrý komıtetiniń tóraǵasy Rýslan Esenalın tabystady.

— Qazaqstan boks federatsııasynyń bas hatshysy Mereı Aqshalovqa TMD Parlamentaralyq Assambleıasynyń qurmet belgisin tabystady. Kýálik «Dene shynyqtyrý, sport jáne týrızm salasynyń damýyna qosqan úlesi úshin» berildi, — dep atap ótti Sport jáne dene shynyqtyrý komıtetiniń baspasóz qyzmeti taratqan habarlamada.

Esterińizge sala ketsek, Mereı Aqshalov jaqynda ǵana Qazaqstan boks federatsııasynyń bas hatshysy bolyp taǵaıyndalǵan bolatyn.

Mereı Tólegenuly Aqshalov — bokstan halyqaralyq dárejedegi sport sheberi, 2004 jyly kadetter arasynda Azııa chempıony atanǵan, 2006 jyly Marokkoda ótken jasóspirimder arasyndaǵy álem birinshiliginde top jarǵan, 2010 jyly AQSh-ta ótken áskerıler arasyndaǵy álem chempıonatynda altyn medal jeńip alǵan, sondaı-aq sońǵy 2010-2012 jyldary «Astana» arlandary sapynda óner kórsetip, 2012 jylǵy el birinshiliginde 64 keli salmaqta chempıon atanǵan.

Mereı Tólegenuly Aqshalovtyń týǵan jeri burynǵy Semeı oblysy Aıakóz aýdany Myńbulaq aýyly. 

Astana qalasyndaǵy Qajymuqan atyndaǵy daryndy balalarǵa arnalǵan mektep-ınternat túlegi.