Bokstan álem chempıondary elge oraldy
ALMATY. KAZINFORM – Bokstan Qazaqstan quramasynyń qyzdary Almatyǵa ushyp keldi.
Almaty halyqaralyq áýejaıynda Serbııanyń Nısh qalasynan qaıtqan bokstan áıelder arasyndaǵy álem chempıonatynyń jeńimpazdary men júldegerlerin týǵan-týystary, jankúıerleri saltanatty túrde qarsy aldy.
Serbııada tarıhı nátıjege qol jetkizgen álemniń úsh dúrkin chempıony, Olımpıadanyń qola júldegeri Nazym Qyzaıbaı jarys týraly oı-pikirin aıtty.
- Óte qýanyshtymyn, armanym boldy jáne men oǵan jettim. Endi kishkene demalyp, qaıta jattyǵýǵa kirisemiz. Álemdik dodada ońaı qarsylastar bolmaıdy. Biraq 48 keli 50 kelige qaraǵanda jeńil boldy. Sebebi ózimdi kúshtirek sezindim, - dedi Nazym Qyzaıbaı.
Buǵan deıin álem birinshiliginiń qola men kúmis júldesin jeńip, bıyl álem chempıony atanǵan Alýa Balqybekova jeńiske jetý ońaı bolmaǵanyn atap ótti.
- Altynǵa jol ońaı bolǵan joq. Buryn qola, kúmis boldy, endi mine altyn medal aldym. Qanshama jyl, eńbek ketti. Bapkerlerimniń arqasynda osyndaı jetistikke jetip otyrmyn. Aldaǵy jospar – taǵy da úlken dodalarda jeńiske jetý. Bul jarystardyń barlyǵy 2028 jyly Los-Andjeleste ótetin Olımpıadaǵa daıyndyq, - dedi Alýa Balqybekova.
Eske salaıyq, Serbııanyń Nısh qalasynda ótken bokstan álem chempıonatynda júlde sany jóninen jalpy komandalyq esepte ekinshi orynǵa taban tiregenin jazǵanbyz.
El quramasynan Nazym Qyzaıbaı (48 keli), Alýa Balqybekova (50 keli) jáne Aıda Ábikeeva (63 keli) chempıon atandy. Vıktorııa Grafeeva (60 keli) men Eldana Tálipova (81 keliden joǵary) kúmis júlde, al Natalıa Bogdanova (70 keli) qola júlde aldy.