Bokstan álem chempıonatynyń júldegerine týǵan jerinde qurmet kórsetildi - OQO
ShYMKENT. QazAqparat - Germanııanyń Gambýrg qalasynda ótken Álem chempıonatynyń qola júldegeri Jomart Erjanǵa týǵan jerinde qurmet kórsetildi. Ońtústik Qazaqstan oblysy, Qazyǵurt aýdanynyń jurtshylyǵy sportshyǵa arǵymaq mingizip, bapkerlerine qarjylaı qoldaý kórsetti, dep habarlaıdy QazAqparat HAA tilshisi.
Jomart Erjan osy aýdandaǵy Sharaphana aýylynda týyp ósken. Buryn-sońdy bul aýyldan sporttyń bıigin baǵyndyrǵan sańlaqtar shyqpaǵan eken. Aýylda týyp, álemdi baǵyndyrǵan sportshynyń jeńisi erteńinen úmit kúttiretin jas jetkinshekterge úlgi deıdi qarııalar. Osyny eskergen aýyl azamattary jeńis tuǵyrynan kóringen uldaryn ardaqtap, atqa mingizdi. Júrekjardy lebizderin jetkizdi.
Al, aýdan basshylyǵy qola júldegerdi qabyldap, qarjylaı qoldaý kórsetti.
Aıta keteıik, ulttyq qurama Gambýrgte ótken álem birinshiligine 9 salmaq boıynsha lıtsenzııa utyp alǵan bolatyn. Alaıda, sońǵy sátte 49 keli salmaqtaǵy ındonezııalyq sportshy chempıonatqa qatysýdan bas tartyp, lıtsenzııa Jomart Erjanǵa buıyrdy. Sportshy ózine berilgen múmkindikti sátti paıdalanyp, shırek fınalda Eýropa chempıony reseılik Vasılıı Egorovty jeńdi. Osylaısha joǵary kásibı sheberligin baıqatty. Jartylaı fınalda bolashaq álem chempıony kýbalyq Hoanıs Arhılagosqa jol berip, qola medaldi qanaǵat tutty.
