Bokstan álem chempıonatynyń toǵyzynshy kúni qalaı qorytyndylandy

TAShKENT. QazAqparat – Ózbekstan astanasy Tashkent qalasynda ótip jatqan álem chempıonatynyń toǵyzynshy jarys kúni, 9 mamyrda Qazaqstan quramasy men olardyń qarsylastary qandaı oıyn kórsetti? Bul týraly QazAqparat tilshisi saraptap kórdi.

El quramasynan bes boksshy sharshy alańǵa shyqty. Olardyń arasynan Mahmýd Sabyrhan (54 keli) úndistandyq Sachın Sıvachty, Dýlat Bekbaýov (67 keli) sol eldiń taǵy bir ókili Akash Sangvandy tize búktirdi.

Al, Aslanbek Shymbergenov (71 keli) Izraılden kelgen Mıroslav Kapýler-Işenkony, Nurbek Oralbaı (80 keli) túrkııalyq Kaan Aıkýtsýndy jeńse, Nurqanat Raıys (75 keli) brazılııalyq Vanderleı Pereıraǵa ese jiberdi.

Ózbekstan quramasynan Hasanboı Dýsmatov (51 keli) kýbalyq Erıslana Romerony, Oıbek Djýraev (54 keli) albanııalyq Arıola Zenelıny, Asadhýdja Mýıdınhýdjaev (67 keli) belarýs Kırıll Samodýrovýtan basym tústi. Sondaı-aq, Alohon Abdýllaev (75 keli) serbııalyq Almır Memıchti qapy qaldyrsa, Saıdjamshıd Djafarov (71 keli) pýertorıkalyq Gabrıel Lıanospen jekpe-jek ótkizbesten jarystyń kelesi satysyna ótti.

Álemdik boksta óz ornyn enshilegen Kýba sapynan Erıslana Romero jeńilisinen ózge qarsylasyna ese jibergen boksshy tirkelgen joq. Atap aıtqanda, Iosvanı Veıtııa (54 keli) túrkııalyq Enver Mýzaffardy, Ronel Iglesıas (67 keli) ekvadorlyq Djankarlo Anchıko Mınany, Arlen Lopes (80 keli) vengrııalyq Palom Kovachtan basym tústi. Oǵan qosa, Horhe Kýelıar (71 keli) ekvadorlyq Hose Rodrıgesti, Ioenlıs Ernandes (75 keli) mońǵolııalyq Otgonjargal Jargaldan aılasyn asyrdy.