Bokstan álem chempıonatynda Levıt pen Tışenko kezdesýi múmkin - Aıtjanov
ASTANA. QazAqparat - Aǵymdaǵy jyldyń tamyz aıynda Gambýrgte ótetin bokstan álem chempıonatynda Vasılıı Levıt pen Evgenıı Tışenko kezdesýi múmkin, dep habarlaıdy QazAqparat.
QR Boks federatsııasynyń habarlaýynsha, bokstan QR Prezıdenti kýbogy úshin halyqaralyq týrnırdiń ashylý rásimne arnalǵan baspasóz máslıhatynda AIBA-nyń halyqaralyq sanattaǵy sýdıasy Valerıı Rachkov búgin bastalǵan baıraqty báseke qyzdar arasynda qarashada ótetin Azııa chempıonaty men erler arasynda tamyzda ótetin álem chemıonatyna daıyndyq ótkizý úshin zor múmkindik ekendigin aıtty.
«Esterińizde bolsa Rıo Olımpıdasynda Levıt pen reseılik boksshynyń jekpe-jegi BAQ-ta úlken dúrbeleń týdyrǵan edi. Barlyǵyna da Vasılııdiń jeńgeni anyq kórinip turdy. Al búgingi týrnırde ol Tokıoǵa daıyndyǵyn bastaıdy jáne biz onyń áleýetin baıqaıtyn bolamyz», - dedi Rachkov.
Al elimizdiń erler quramasynyń bas jattyqtyrýshysy Myrzaǵalı Aıtjanov Gambýrgte ótetin álem chempıonatynyń jartylaı nemese fınalynda Vasılıı Levıt pen reseılik Evgenıı Tışenkonyń kezdesýi kútiletindigin basa aıtty.
