Bokstan Álem chempıonatynda Qyzaıbaı men Lýkas kezdespeıtin boldy

YSTANBUL. QazAqparat – Qazaqstandyq boksshylar Nazym Qyzaıbaı men Angelına Lýks Ystanbulda ótetin áıelder arasyndaǵy Álem chempıonatynda bir-birimen jekpe-jek ótkizbeıtin boldy. QazAqparat bul týraly Sports.kz saıtyna silteme jasap habarlaıdy.

Áýelde Lýkas pen Qyzaıbaı Álem chempıonaty – 2022-de bir salmaq sanatynda (50 kelige deıin) óner kórsetedi dep josparlanǵan edi. Týrnırde qos qazaqstandyq boksshynyń bir-birimen jekpe-jekke shyǵý yqtımaldyǵy boldy. Biraq salmaq ólsheý nátıjesimen sportshylarymyz ártúrli salmaq sanatyna tústi: Nazym Qyzaıbaı – 50 keli, Angelına Lýkas 52 keli.

Aıta keteıik, daýly másele boıynsha buǵan deıin Qazaqstan quramasynan ketken Angelına Lýkas Ystanbuldaǵy Álem chempıonatynda IBA (Halyqaralyq boks qaýymdastyǵy) atynan shyǵyp, Fair Chance Team komandasynyń namysyn qorǵaıtyn bolady.

Buǵan deıin habarlaǵanymyzdaı, búgin Túrkııada bokstan áıelder arasyndaǵy Álem chempıonaty jalaýyn kóteredi. Elimizdiń atynan 12 boksshy synǵa túsedi.

Alǵashqy jekpe-jek 9 mamyrda ótkizilip, fınaldyq saıystar 19-20 mamyr kúnderine belgilengen.

El quramasy sapynda Nazym Qyzaıbaı (50 keli), Jaına Shekerbekova (52 keli), Dına Jolaman (54 keli), Karına Ibragımova (57 keli), Rımma Volosenko (60 keli), Aıda Ábikeeva (63 keli), Darıǵa Shákimova (66 keli), Valentına Halzova (70 keli), Nadejda Rıabets (75 keli), Gúlsaıa Erjan (81 keli) jáne Lázzat Kúngeıbaeva (81 keliden joǵary) sharshy alańǵa shyǵady.

Qazaqstandyq boksshylar alǵashqy jekpe-jeginde Kanada, Kolýmbııa, Pýerto-Rıko, Ispanııa, Fınlıandııa, Aljır, Ózbekstan, Kenııa, Túrkııa jáne Ýkraına boksshylarymen kezdesedi.