Bokstan Álem chempıonatynda Qazaqstan namysyn segiz birdeı qurlyq serkesi qorǵaıdy
ASTANA. 16 shilde. QazAqparat - Qazaqstan quramasynyń bas jattyqtyrýshysy Myrzaǵalı Aıtjanov Almatyda ótetin Álem chempıonatyna Iordanııada qurlyq birinshiliginde top jarǵan segiz sportshyny alyp barady, dep habarlaıdy Vesti.kz.
"Biz josparly daıyndyq júrgizdik jáne týrnırden Qazaqstanǵa júldesiz oralyp, jankúıerlerdi jerge qaratqymyz kelmedi. Men balalardy bar múmkindikterin salýǵa shaqyrdym. Aldymyzda Álem chempıonaty kútip tur. Mundaı komandamen biz taǵy da jospardy artyǵymen oryndaýǵa tyrysamyz. Jáne Olımpıadada, eki altyn marapattyń ornyna, kem degende úsh altyn alyp kelgimiz keledi», - dep atap aıtty Aıtjanov.
Qazaqstan boks federatsııasynyń prezıdenti Tımýr Qulybaev Álem chempıonatynyń aldynda QR quramasynyń múshelerin «bosańsymaýǵa» shaqyrdy.
"Azııa chempıondaryn, júldegerler men jattyqtyrýshylar shtabyn syıaqylar kútip tur, - dep málimdedi QBF basshysy. - Qurlyq birinshiliginde jeti medal alý - buryn-sońdy bolmaǵan nátıje. Biz Azııanyń serkesi jáne álemdegi úzdikterdiń biri ekenimizdi dáleldedik. Barlyǵyńyzdy osy jetistikpen quttyqtaımyn! Biraq alda áli kóp jumys kútip tur».
Azııa chempıonatynyń qorytyndysy boıynsha Qazaqstan quramasy jeti altyn jáne bir kúmis medaldi ıelenip, jalpy komandalyq esepte birinshi oryndy ıelengenin eske salamyz. Birden jeti boksshy Azııa chempıony atandy, olar: Temirtas Júsipov (49 kelige deıingi salmaq dárejesinde), Berik Ábdirahmanov (60 kelige deıingi salmaq dárejesinde), Mereı Aqshalov
(64 kelige deıingi salmaq dárejesinde), Danııar Eleýsinov (69 kelige deıingi salmaq dárejesinde), Jánibek Álimhanuly (75 kelige deıingi salmaq dárejesinde), Anton Pınchýk (91 kelige deıingi salmaq dárejesinde) jáne Ivan Dychko ( 91 keliden joǵary). Al Ádilbek Nııazymbetov 81 kelige deıingi salmaq dárejesinde kúmis júldeger boldy.
