Bokstan álem chempıonaty: Jartylaı fınalda 5 qazaqstandyq synǵa túsedi
NUR-SULTAN. QazAqparat - Polshanyń Keltse qalasynda ótip jatqan jastar arasyndaǵy álem chempıonatynda erler arasynda qazaqstandyq 5 boksshy jartylaı fınalǵa joldama aldy, dep habarlaıdy QazAqparat Qazaqstan boks federatsııasyna silteme jasap.
Bul elimizdiń bylǵary qolǵap sheberleriniń kem degende qola medal ıelenýine múmkindik jasaıdy. Qazaqstan quramasynyń aldynda tek Reseı tur.
Aıta keteıik, shırek fınalda qazaqstandyq 10 boksshy saıysqa túsken bolatyn. Olardyń arasynan tek beseýi jarysty jalǵastyrýǵa múmkindik aldy. Al Reseıde - 7, Úndistan, Ýkraına men Ózbekstanda - 4, Kýbada -3, Bolgarııada - 2, Mońǵolııa, Italııa, Kolýmbııa, Qyrǵyzstan, Brazılııa, Vengrııa, Armenııa, Polsha, Ázerbaıjan, Chernogorııa men Japonııada - 1 boksshy endi jartylaı fınalda sharshy alańǵa shyǵady.
Aıta keteıik, 49 kelide qazaqstandyq Sanjar Táshkenbaı ózbek elinen kelgen Ibrohım Ýshjonovty jeńip ketti. Kelesi joldamaǵa 56 kelidegi Erbolat Sabyr ıe bolyp, ol jartylaı fınalda reseılik Alekseı Shendrıkpen qolǵap túıistiredi.
Qorjynǵa taǵy bir júldeni 64 kelidegi Sabyrjan Aqqalyqov túsirdi. Kýbalyq Darıan Favıer Kastromen jekpe-jekke shyqqan ol tóreshiler sheshimimen jarysty jalǵastyratyn boldy.
Al 75 keli salmaqtaǵy Dıas Moljigitov lıtvalyq Aleksandr Trofımchýktiń osal tusyn tapty. Kelesi qarsylasy - reesılik Mıhaıl Ýsov.
Jartylaı fınalǵa joldama alǵan taǵy bir qazaqstandyq boksshy Elnur Súıinbaı 60 kelide shırek fınalda jeńiske jetti. Endi ol jartylaı fınalda Djon Elın Orobıo Sınıestrmen qolǵap túıistiredi.
Al qyzdar arasynda qazaqstandyq boksshylar arasynan Juldyz Shaıahmetova (60 keli) Jasmın Qızatova (69 keli) Ásel Saǵatova (81 keli) Eldana Tálipova (81 keliden joǵary) osyndaı múmkindikke ıe bolǵan edi.
Jartylaı fınal 20 sáýirge belgilengen. Al 22-23 sáýir kúnderi jeńimpazdar anyqtalady.
Esterińizge sala ketelik, jastar arasyndaǵy álem chempıonatyna elimiz atynan 20 boksshy attanǵan bolatyn