Bokstan álem chempıonaty: Ulttyq qurama kapıtany Aslanbek Shymbergenov shırek fınalǵa shyqty

ASTANA. QazAqparat – Tashkent qalasynda bokstan erler arasynda ótip jatqan álem chempıonatynda ulttyq qurama kapıtany Aslanbek Shymbergenov shırek fınalǵa shyqty, dep habarlaıdy QazAqparat tilshisi.

Azııa chempıony Aslanbek Shymbergenov 71 kelige deıingi salmaqta 1/8 fınalda Izraıl ókili Mıroslavom Kapýler-Işenkomen sheberlik baıqasty.

Qazaqstandyq boksshy jekpe-jek barysynda basymdylyǵyn aıqyn kórsetti. Úshinshi raýndta nokdaýn da tirkeldi. Tóreshiler esebi – 5:0.

A.Shymbergenov jartylaı fınalǵa shyǵý úshin frantsııalyq Makan Traeoremen talasady. Ol kútpegen jerden tóreshilerdiń biraýyzdan sheshimimen álem chempıony, japonııalyq Sevon Okadzavany jeńip ketti.

Búgin sondaı-aq Qazaqstannan Nurbek Oralbaı (80 kg), Mahmud Sabyrhan (54 kg) jáne Dýlat Bekbaýov (67 kg) rıngke shyǵady.

Eske sala keteıik, budan buryn bokstan álem chempıonatynda Mahmud Sabyrhannyń alǵashqy jeńisine qol jetkizgenin jazǵan edik.

Sondaı-aq Sanjar Táshkenbaı Tashkentte ózbekstandyq boksshyny nokdaýnmen jeńdi.

Sanjar Táshkenbaı qazaqtyń kók týyn jelbiretkisi keletinin aıtty.

Saǵyndyq Toǵambaı jarys jolynan shyǵyp qaldy.