Bokstan álem chempıonaty: Sharshy alańǵa búgin eki qazaqstandyq shyǵady
Jarystyń alǵashqy kúninde qazaqstandyq eki boksshy sharshy alańǵa shyǵady.
Serik Temirjanov 1/32 fınalda mońǵolııalyq Enh-Amar Harhýýmen qolǵap túıistiredi. Ol 57 kelide synǵa túsedi
S.Temirjanov 1998 jyly dúnıege kelgen. Buǵan deıin 2020 jylǵy Tokıo Olımpıadasynda baq synady.
Taǵy bir jekpe-jekte Abylaıhan Júsipov (67 keli) Taıbeıden kelgen ıÝ Lınmen sheberlik baıqasady.
A.Júsipov 1997 jyly dúnıege kelgen. 2017, 2019 jyldarda álem chempıonatynda qola júldeger atansa, 2017 jyly Azııa chempıonatynda kúmis aldy.
Ol bıylǵy álem chempıonatynda ulttyq quramanyń kapıtany mindetin atqarady.
Eske salsaq, ulttyq quramanyń bas bapkeri Qaırat Sátjanov dúbirli dodada olardan basqa Temirtas Júsipov (48 keli), Sáken Bıbosynov (51 keli), Mahmýd Sabyrhan (54 keli), Samatalı Tóltaev (60 keli), Sanatalı Tóltaev (63,5 keli), Aslanbek Shymbergenov (71 keli), Nurqanat Raıs (75 keli), Nurbek Oralbaı (80 keli), Bek Nurmaǵambet (86 keli), Aıbek Oralbaı (92 keli) men Nurlan Saparbaı (92 keliden joǵary) syndy sportshylarǵa senim artty.
Jekpe-jek elorda ýaqytymen 22.00-de «Qazsport» telearnasy arqyly tikeleı efırde kórsetiledi.
Dúnıejúzilik doda 1974 jyldan beri turaqty túrde uıymdastyrylady. Qazaqstan quramasy búginge deıin 12 altyn, 13 kúmis, 21 qola júlde aldy.
Bıyl álem chempıonatyna 100-den astam elden 650-ge jýyq sportshy keledi.
Jarysqa Olımpıada chempıondary, Azııa, Eýropa júldegerleri, álem chempıondary da qatysady dep kútilýde.
Aıta keteıik, álem chempıonatynyń jalpy júlde qory - 2,6 mln AQSh dollar. Jeńimpaz 100 000 dollar alsa, kúmis júldeger 50 000, qola júldeger 25 000 dollar alady.
