Bokstan álem chempıonaty: Serik Temirjanov jarysty jalǵastyrady
NUR-SULTAN. QazAqparat - Búgin Serbııa astanasy Belgrad qalasynda bastalǵan bokstan álem chempıonatynda qazaqstandyq Serik Temirjanov alǵashqy jekpe-jegin ótkizdi, dep habarlaıdy QazAqparat tilshisi.
Qazaqstandyq boksshy 57 kelide mońǵolııalyq Enh-Amar Harhýýmen qolǵap túıistirdi. Birinshi raýndta sharshy alań jıegindegi tórt tóreshi Seriktiń basym túskenin kórsetti. Ekinshi raýndta tóreshiler biraýyzdan qazaqstandyq sportshynyń jeńgenin atap ótti. Úshinshi raýndta da tóreshiler osyndaı sheshimge keldi.
Osylaısha Serik jarystyń 1/16 fınalyna joldama aldy.
S.Temirjanov 1998 jyly dúnıege kelgen. Buǵan deıin 2020 jylǵy Tokıo Olımpıadasynda baq synady.
Sondaı-aq, búgin taǵy bir jekpe-jekte Abylaıhan Júsipov (67 keli) Taıbeıden kelgen ıÝ Lınmen sheberlik baıqasady.
Eske salsaq, ulttyq quramanyń bas bapkeri Qaırat Sátjanov dúbirli dodada olardan basqa Temirtas Júsipov (48 keli), Sáken Bıbosynov (51 keli), Mahmýd Sabyrhan (54 keli), Samatalı Tóltaev (60 keli), Sanatalı Tóltaev (63,5 keli), Aslanbek Shymbergenov (71 keli), Nurqanat Raıs (75 keli), Nurbek Oralbaı (80 keli), Bek Nurmaǵambet (86 keli), Aıbek Oralbaı (92 keli) men Nurlan Saparbaı (92 keliden joǵary) syndy sportshylarǵa senim artty.
Bıyl álem chempıonatyna 100-den astam elden 650-ge jýyq sportshy keledi. Jarysqa Olımpıada chempıondary, Azııa, Eýropa júldegerleri, álem chempıondary da qatysady dep kútilýde.
Álem chempıonaty 6 qarashada máresine jetedi.
