Bokstan álem chempıonaty: Nııazymbetov aýyr salmaqtaǵy Chelesti teńseltti
TANA.-BAKÝ. 29 qyrkúıek. QazAqparat - Bakýde Geıdar Álıev atyndaǵy kontsert-sport kesheninde ótip jatqan bokstan álem chempıonatynyń úshinshi kúni rıngke 56,60,64,75 jáne 81 keli salmaqtaǵy sportshylar shyqty.
Bul týraly Astana qalasynyń týrızm, deneshynyqtyrý jáne sport basqarmasynyń baspasóz qyzmeti habarlaıdy.
Qazaqstandyq boksshy Ádilbek Nııazymbetov bul kúni 81 kelide óner kórsetken birden-bir jerlesimiz boldy. Onyń moldovalyq Vladımır Chelespen jekpe-jegi keshki baǵdarlamany qorytyndylady.
Álibek boz kilemde qarsylasyn áp-degende shaýshaıdan alyp, tikeleı soqqylarmen shabýylǵa kóshti. Alaıda Vladımır jekpe-jekke asyqqan joq, birdi-ekili soqqymen qarsylyq kórsetip qana júrdi, Degenmen taqaý tustan qazaqstandyq boksshy eki soqqyny dál tıgizdi. Sonymen alǵashqy úsh mınýttyń qorytyndysy: esep - 6:4. Kelesi raýndta boksshylar alys qashyqtyqtan ortasha qashyqtyqqa jaqyndap keldi, odan ári taıaýdaǵy urysta da erkin siltedi. Qarama-qarsy urys salǵan boksshylar jekpe-jeginiń bul bóliginde Ádilbek qarsylasyn tegeýrindi qımylymen yqtyryp, ınıtsıatıvany óz qolyna aldy. Endi esep 13:6 bolyp Nııazymbetov alǵa sýyrylyp shyqty. Al úshinshi raýndta Cheles bar kúshin saldy. Jattyqtyrýshysynyń nusqaýyn oryndaı otyryp, soqqy sanyn da eseleı tústi. Degenmen bul jalpy jeńis úshin jetkiliksiz boldy. Sóıtip, 16:11 esebimen bizdiń boksshymyz jeńiske qol jetkizdi.
Endi ol kelesi jekpe-jekte Azııanyń qazirgi chempıony koreıalyq Kım Hıonkıýmen synǵa túsedi.
Búgingi jarys kestesinde 69 kelide Serik Sapıev Karlos Sanchezben (Ekvador) qolǵap túıistiredi.
