Bokstan álem chempıonaty: Qazaqstandyq úsh sportshy jarysty jalǵastyrady
NUR-SULTAN. QazAqparat - Polshanyń Keltse qalasynda ótip jatqan jastar arasyndaǵy álem chempıonatynda qazaqstandyq boksshylar qatysqan birqatar jekpe-jek nátıjeleri belgili boldy, dep habarlaıdy QazAqparat Qazaqstan boks federatsııasyna silteme jasap.
Elorda ýaqytymen 18.00-de kúndizgi sessııa bastalǵan bolatyn. Onda qazaqstandyq tórt bylǵary qolǵap sheberi sharshy alańda básekege tústi. Úsheýinde jeńiske jetse, bireýinde qarsylasyna ese jiberip qoıdy.
Qyzdar arasynda 57 kelide synǵa túsken Nazerke Serik 1/4 fınalda úndistandyq qarsylasyna ese jiberip qoıdy. Osylaısha jarys jolynan shyǵyp qaldy.
Kelesi kezekte qazaqstandyq Eldana Tálipova (81 keliden joǵary) ýkraınalyq Vıktorııa Levchýkti aıqyn basymdyqpen jeńdi. Osylaısha 1/2 fınalyna joldama aldy.
Taǵy bir boksshymyz Elnur Súıinbaı 60 kelide qarsylasyn birinshi raýndta nokdaýnǵa jiberdi. Eseńgirep qalǵan slovak bokshysy Adolf Stanek jekpe-jekti jalǵastyrýdan bas tartty.
Búgin keshki sessııada taǵy qazaqstandyq úsh boksshy sharshy alańǵa shyǵady.
Esterińizge sala ketelik, jastar arasyndaǵy álem chempıonatyna elimiz atynan 20 boksshy attanǵan bolatyn.
