Bokstan álem chempıonaty: Qazaqstandyq tórt jas sportshy fınalǵa shyqty
NUR-SULTAN. QazAqparat - Polshanyń Keltse qalasynda ótip jatqan jastar arasyndaǵy álem chempıonatynda jartylaı fınalǵa shyqqan qazaqstandyq bes boksshynyń tórteýi aqtyq synǵa joldama aldy, dep habarlaıdy QazAqparat Qazaqstan boks federatsııasyna silteme jasap.
Budan buryn jartylaı fınalǵa jigitter arasynda qazaqstandyq bes boksshy shyqqanyn habarlaǵan edik.
Álem chempıonatynda 49 kelide synǵa túsip jatqan Sanjar Tashkenbaı úndistandyq Bıshvamıtr Chongtamnyń osal tusyn tapty. Odan keıin 56 kelide Erbolat Sabyr reseılik Alekseı Shendrıkti qapy qaldyrdy.
Sondaı-aq, 60 kelidegi Elnur Súıinbaı kolýmbııalyq Djon Elına Orobıo Sınıestrdi jeńse, Sabyrjan Aqqalyqov (64 keli) Ankıt Narvaldan basym tústi.
Al Dıas Moljigitov (75 keli) reseılik Mıhaıl Ýsovqa ese jiberip, qola júldeni qanaǵat tutty.
Nátıjesinde endi qazaqstandyq tórt boksshy fınalda baq synaıdy. Fınal 22-23 sáýir kúnderine belgilengen.
Budan buryn qazaqstandyq eki boıjetken fınalǵa shyqqanyn habarlaǵan edik.
