Bokstan álem chempıonaty: Qaırat Erálıev jarysty jalǵastyrady

NUR-SULTAN. QazAqparat - Búgin Reseıdiń Ekaterınbýrg qalasynda ótip jatqan bokstan álem chempıonatynda Qaırat Erálıev 1/4 fınalǵa joldama aldy, dep habarlaıdy QazAqparat tilshisi.

Qaırat Erálıev 57 keli salmaqta taılandtyq Chatchaı Býtdımen qolǵap túıistirdi. Tóreshiler sheshimimen jeńis qazaqstandyq boksshyǵa berildi.

Taılandtyq boksshy da ońaı qarsylas emes edi. Ol 2015 jyly álem chempıonatynda qola júldeger atansa, 2015 jyly Azııa chempıony ataǵyna qol jetkizdi.

Qaırat Erálıev 2013 jyly álem chempıonatynda qola alsa, 2017 jyly chempıon atandy. Al 2015, 2017 jyldarda Azııa chempıony boldy.

Budan buryn Qaırat Erálıev venesýelalyq Ioel Fınoldi basym túsken bolatyn.

Búgin buǵan deıin qazaqstandyq úsh boksshy sharshy alańǵa shyqty. Olardyń ekeýi jarysty jalǵastyratyn bolsa, bireýi álem chempıonatyn erte aıaqtady.