Bokstan álem chempıonaty: Qaırat Erálıev jarystan shyǵyp qaldy

NUR-SULTAN. QazAqparat - Reseıdiń Ekaterınbýrg qalasynda ótip jatqan bokstan álem chempıonatynda Qaırat Erálıev jarystan shyǵyp qaldy, dep habarlaıdy QazAqparat tilshisi.

Ol 57 keli salmaqta ózbek boksshysy Mırazızbek Mırzahalılovpen qolǵap túıistirgen edi. Degenmen bul kezdesýde Qaırat qarsylasyna ese jiberip qoıdy. Osylaısha jartylaı fınalǵa ózbekstandyq bylǵary qolǵap sheberi joldama aldy.

Buǵan deıin qazaqstandyq boksshylar qatarynan Sáken Bıbosynov (52 keli), Tursynbaı Qulahmet (75 keli) jáne Vasılıı Levıt (91 keli) joldama alǵan edi.

Sondaı-aq, búgin Abylaıhan Júsipov (69 keli) Domınıkan Repýblıkasynan kelgen Roan Polankomen, Bekzat Nurdáýletov (81 keli) túrkııalyq Baıram Malkanmen, Qamshybek Qońqabaev (91 keliden joǵary) Germanııadan kelgen Nelvı Tılfakpen sharshy alańǵa shyǵady.