Bokstan álem chempıonaty: Búgin eki qazaqstandyq jas sportshy sharshy alańǵa shyǵady

NUR-SULTAN. QazAqparat - Germanııanyń Kelts qalasynda ótip jatqan jastar arasyndaǵy álem chempıonatynda búgin, 14 sáýirde qazaqstandyq eki boksshy sharshy alańǵa shyǵady, dep habarlaıdy QazAqparat tilshisi.

Esterińizge sala ketelik, dúnıejúzilik dodada búgin 52 jáne 91 kelige deıingi salmaqta boksshylar sheberlik baıqasady. Bizdiń elimizdiń atynan Kenje Muratuly men Mádı Ámirov sharshy alańǵa shyǵady. Jarys elorda ýaqytymen saǵat 18:00-de bastalady.

Jarystyń birinshi kúninde 56 kelige deıingi salmaqta qazaqstandyq Erbolat Sabyr alǵashqy kezdesýinde jeńiske jetti. Vengrııalyq qarsylasyn 5:0 (30:25, 30:25, 30:24, 30:27, 30:25) esebimen jeńip, kelesi aınalymǵa ótti. Endi ol 17 sáýirde latvııalyq boksshymen qolǵap túıistiredi.

Aıta keteıik, álem chempıonatynda elimizdiń atynan Sanjar Táshkenbaı (49 keli), Kenje Muratuly (52 keli), Erbolat Sabyr (56 keli), Elnur Súıinbaı (60 keli), Sabyrjan Aqhalyqov (64 keli), Nurjan Amankeldi (69 keli), Dıas Moljigitov (75 keli), Erasyl Jakpekov (81 keli), Mádı Ámirov (91 keli) jáne Amanat Sabyrǵalı (91 keliden joǵary) cynǵa túsedi.